Pressemelding

6.12.96

Område med forbod mot oppankring og fiske på Balderfeltet

Regjeringa har i dag oppretta område med forbod mot oppankring og fiske med botntrål og snurrevad over 4 grupper av undervassinnretningar på Balderfeltet.

Feltet ligg i midtre del av Nordsjøen om lag 190 km vest for Stavanger. Nærmaste feltinstallsjon er Heimdal 45 km nord for Balder. I sør er Sleipner nærmaste feltinstallsjon, 90 km unna.

Esso Norge AS er operatør på Balderfeltet.

Kommunal- og arbeidsdepartementet har ut ifrå ei heilskapleg vurdering kome fram til at omsyn til tryggleik taler klårt for oppretting av område med forbod mot oppankring og fiske over undervassinnretningane på feltet.

Forbodet er permanent, det vil seie at det gjeld i levetida til feltet på 15 år. Forskrifta trer i kraft straks.