Pressemelding

Oslo, 17.03.97

Auka etablerarstipend-midlar til fylker prega av fråflytting

Kommunal- og arbeidsdepartementet vidarefører satsinga på etablerarstipend. 121 millionar kroner er sett av til ordninga for 1997, og det blir særleg lagt vekt på dette som eit verkemiddel for å stimulere til nyetableringar i fråflyttingsområde.

• Eg ønskjer å styrke verkmiddelbruken i dei delar av landet som har ei negativ utvikling i folketalet, seier kommunal- og arbeidsminister Kjell Opseth.
• Målet for distrikts- og regionalpolitikken er å halde oppe hoveddraga i busetjingsmønsteret og å vidareutvikle levedyktige regionar i alle delar av landet. For å nå dette målet er det naudsynt å auke innsatsen i fråflyttingstruga utkantstrok, seier Opseth.

Han peiker vidare på kor viktig det er at fylkeskommunane sjølv prioriterar vanskelegstilte område ved tildeling av etablerarstipend.

Etablerarstipendet er ei ordning for småbedriftsetablerarar i heile landet. Målet med stipendet er å stimulere til auka etablerarverksemd, og skape varige og lønsame arbeidsplassar.

Ein kan få stipend til utviklingsfasen, det vil seie perioden da ein utviklar forretningsidéen, og/eller til etableringsfasen. Maksimalt beløp for den einskilde mottakar er kroner 200.000.

FYLKESVIS FORDELING AV ETABLERERSTIPEND, 1000 kr