Pressemelding

Oslo, 10.07.97

Husbanken på trygg grunn - Bankforeninga nådde ikkje fram med klagen sin

Den Norske Bankforeningen klagde i november 1995 Husbanken inn for ESA (EFTA Surveillance Authority). I går, 9. juli tok ESA si avgjerd i saka. Bankforeningen fikk ikkje medhald.

Eg er nøgd med utfallet av saka og er glad for den stadfestinga som dette er av Husbankens sentrale rolle for å fremje statleg, sosial bustadpolitikk. Eg vonar at det no kan bli ro om bustadfinansieringa, seier statsråd Kjell Opseth.

Bankforeningen hevda at Husbankens långjeving er i strid med EØS-avtala og verker hemmande på konkurransen på kredittmarknaden. Spesielt hevda Bankforeninga i klagen sin at statleg subsidiering av lån gjer det vanskeleg for andre kredittinstitusjonar å konkurrere på marknaden for bustadfinansiering.

ESA ser Husbankens långjeving som ein integrert del av den sosiale bustadpolitikken i Noreg og har ikkje funne grunn til å rokke ved den sentrale rolla som Husbanken spiller i den statlege bustadpolitikken. ESA har funne at rammene for Husbankens verksemd ikkje går utover det som er naudsynt for at den kan gjennomføre dei oppgåvene som offentlege styresmakter har pålagt den. ESA finn derfor ikkje grunn til å forfølgje saka vidare.

ESA peiker mellom anna på at Husbanken ikkje har monopol på nokon form for bustadsfinansiering. Det vert og lagt vekt på at banken ikkje er ein regulær bank etter EØS reglane. Den tar mellom anna ikkje innskott frå publikum og driv ikkje med generell betalingsformidling.

ESA legg og vekt på at låna frå Husbanken vert gjevne etter andre kriterium enn i dei private bankane og til dei same vilkår til låntakarane. Husbanken stiller ikkje dei same, strenge krava til kredittverde som dei private bankane. Også i distrikta der andrehandsverdet av bustaden kan vere låg, gjev Husbanken lån på rimelege vilkår. Andre moment som ESA legg vekt på er mellom anna Husbankens rolle til å fremje sosiale bustadformål som til dømes bygging av rimelege bustader, tilgjenge for funksjonshemma samt fremjing av andre prioriterte bustadkvalitetar.