Pressemelding

10.01.97

Presseinformasjon

Vi sender denne informasjonen fordi Stortinget sitt vedtak på ein del punktar avvik frå Regjeringa sitt forslag til vallov.

I statsråd i dag er Stortinget sitt vedtak av 17. desember 1996 om endringar i vallova sanksjonert.

Hovudpunkta i vedtaket er følgjande:

• Postverket tek over ansvaret for all førehandsrøysting innanriks(med unntak av Svalbard og Jan Mayen), inkludert førehandsrøysting på institusjonar og røystmottak heime hos veljarar som er sjuke eller uføre, etter mønster av ordningane i Sverige og Finland.
• Postrøysting erstattar dagens førehandsrøysting i regi av kommunane.
• Utanom postkontora tek landpostbod og utsende postfunksjonærar imot førehandsrøyster.
• Postrøystinga startar 15. juli i valåret.
• Postrøystinga blir avslutta fredag før valdagen.
• Valstyra skal krysse av i manntalet for førehandsrøystene etter kvart som dei kjem inn.
• Postrøysta (førehandrøysta) blir endeleg. Når valstyret har kryssa av i manntalet før valdagen for veljarar som har førehandsrøysta, får dei ikkje høve til å røyste på nytt på valdagen.
• Førehandsrøystene må vere komne til valstyret seinast innan utgangen av tysdagen (dagen) etter valdagen dersom dei skal reknast med ved valet.
• Det skal framleis vere opp til kommunestyret å avgjere om det skal vere ein eller to dagars val i kommunen.
• Det blir innført ei obligatorisk ordning med valkort som veljaren må ha med for å kunne førehandsrøyste hos Postverket (kravet om å ha med valkort skal ikkje gjelde dei som røyster på valdagen).

• Kommunane skal framleis ha ansvaret for å utarbeide manntal.

I høve til framlegget frå Regjeringa er det gjort 3 endringar:

• Postrøystinga startar 15. juli i valåret (Regjeringa foreslo 10. august).
• Postrøystinga blir avslutta fredag før valdagen (Regjeringa foreslo torsdag før valdagen).
• Førehandsrøystene må vere komne til valstyret seinast innan utgangen av tysdagen (dagen) etter valdagen dersom dei skal reknast med ved valet (Regjeringa foreslo å oppretthalde den tidlegare ordningen, at førehandsrøystene måtte vere valstyret i hende før vallokala stengde måndag).

Stortingsvalet og sametingsvalet er måndag 15. september 1997.