Pressemelding

Oslo, 13.10.97

Statsbudsjettet 1998

Distriktspolitiske utfordringar

I forslag til statsbudsjett for 1998 vil Regjeringa auke satsinga mot utkantområde som har sterk nedgang i folketalet. I budsjettforslaget for 1998 skal løyvinga til kommunale næringsfond auke med 38,2 prosent til 130 millionar kroner. På det regionale programmet for næringsutvikling er 25 millionar kroner øyremerkt ei ekstraordinær satsing på utkantområde, utbygging av hamner og IT.

- Målet for distrikts- og regionalpolitikken er å halde oppe hovuddraga i busetjingsmønsteret og å utvikle robuste regionar i alle delar av landet. Utkantområda skal òg prioriterast innanfor dei andre distriktspolitiske ordningane, seier kommunal- og arbeidsminister Kjell Opseth.

Løyvingane til etablerarstipendet er auka med 3,8 millionar kroner til 125 millionar kroner. Etablerarstipendet er ei ordning for etablerarar av småbedrifter i alle deler av landet, men område med sterk nedgang i folketalet skal bli prioritert. På regionale program for næringsutvikling har ein auka løyvinga med 4,9 millionar kroner til 236,1 millionar kroner. Midlane på denne løyvinga blir mellom anna nytta til næringsutvikling gjennom investeringar i fysisk infrastruktur, kunnskapsspreiing og større regionale samarbeids- og tiltaksprosjekt. Døme på tiltak som blir finansierte, er utbygging av kaier, auka samarbeid mellom skolar og næringsliv, og utvikling av bedriftsnettverk.

- Dette syner at Regjeringa følgjer opp og tek på alvor dei utfordringane vi har i distrikta, og særleg i utkantområde med sterk nedgang i folketalet, seier Kjell Opseth. I tillegg er SIVA-innskotskapital auka med 5 millionar til 10 millionar kroner, og Gjesdal kommune har fått ein kompensasjon for ikkje-utbygging av Frafjordvassdraget på 5 millionar kroner.

Den betra økonomiske situasjon for næringslivet generelt, gjer at bedriftene sjølve i større grad bør kunne finansiere meir av dei aktivitetane som løyvingane skal dekkje. Dette er bakgrunnen for at den distriktspolitiske operasjonsramma er redusert frå 1 565 millionar kroner til 1 507 millionar kroner.