Kristendomskunnskap med religions- og livssynsorientering:
Historisk arkiv
Publisert under: Regjeringen Jagland
Utgiver: Kirke-, utdannings- og forskningsdepartementet
Pressemelding | Dato: 14.03.1997 | Sist oppdatert: 21.10.2006
Pressemelding
Nr. 022 -97
14. mars 1997
Kristendomskunnskap med religions- og livssynsorientering:
Avgrensa fritak frå religiøse aktivitetar
Kyrkje-, utdannings- og forskingsdepartementet gjer framlegg om rett til avgrensa fritak frå å seie fram truvedkjenningar eller bøner, lære utanåt religiøse tekstar, delta i salmesong eller i andre religiøse aktivitetar, delta i dramatisering eller liknande og å vere til stades i ritual eller gudstenester i ulike trussamfunn.
Dette er hovudboskapen i Ot.prp. nr. 38 (1996-97) Om lov om endringar i lov 13. juni 1969 nr. 24 om grunnskolen m.m. som passerte statsråd fredag. Framlegget inneheld endringar som knyter seg til opplæringa i faget kristendomskunnskap med religions- og livssynsorientering og til avgrensa fritak frå opplæring i faget.
Departementet presiserer at retten til avgrensa fritak også skal omfatte religiøse aktivitetar utanom faget kristendomskunnskap med religions- og livssynsorientering. Dette gjeld til dømes skoleavslutning i kyrkja og salmesong i musikktimar.
Lova skal òg fastsetje at kristendomskunnskap med religions- og livssynsorientering er eit kunnskapsfag og at opplæringa ikkje skal vere forkynnande.
Det blir fremja lovforslag om retten til å klage over at opplæringa strir mot lov og forskrifter om faget. Klageretten skal også omfatte den nærmare gjennomføringa av avgrensa fritak. Staten skal vere klageinstans. Departementet vil komme tilbake til Stortinget med ei oversikt over praktiseringa når fritaksreglane har vore brukte i ein 3-årsperiode.
Det vil bli utarbeidd eit eige informasjonsopplegg om faget til bruk for foreldre/føresette.
Det ligg føre ein eigen plan for etterutdanning i faget.
Dei folkerettslege spørsmåla knytte til faget er utgreidde av Erik Møse og vart overlevert KUF i januar i år.