Pressemelding

Nr. 021-97
14. mars 1997

Ny felles opplæringslov

· Ei felles lov for grunnskolen og den vidaregåande opplæringa (Opplæringslova)

· Ny felles formålsparagraf

· Lovfesting av prinsippet om tilpassa opplæring

· Lovfesting av arbeidet mot mobbing

· Krav om politiattest i grunnskolen

· Rett og plikt til opplæring utan omsyn til om eleven oppheld seg lovleg i landet

· Nye reglar om samisk opplæring

· Rett til opplæring i finsk

· Rett til opplæring i teiknspråk

· Forskriftsfesting av morsmåls- og norskopplæring for språklege minoritetar

· Aldersblanda klassar ut frå omsynet til elevane

· Strengare rektorkrav

· Normalisering av stillingsvernet

· Skjerpa krav til heimeundervisning

· Lovfesting av PP-tenesta både i kommunar og fylkeskommunar

Dette er nokre av hovudpunkta i framlegget til ny opplæringslov , Ot. prp. nr. 36 (1996-97) Om ny lov om grunnskolen og vidaregåande opplæring som passerte Statsråd fredag. Den nye lova kjem i staden for grunnskolelova, lov om vidaregåande opplæring, fagopplæringslova og privatskolelova. Visse delar av vaksenopplæringslova går inn i den nye lova. Lovframlegget baserer seg på NOU 1995: 18 Ny lovgivning om opplæring (Smith-utvalet), som vart lagt fram i juli 1995. Over 500 høyringsfråsegner kom inn i samband med innstillinga.

Framlegget til ny opplæringslov er m.a. grunna i endringane i samband med reformene i grunnskole (Reform 97) og vidaregåande opplæring (Reform 94).

Lovframlegget frå Kyrkje-, utdannings- og forskingsdepartementet inneber m.a. :

Formålsparagrafane som i dag finst i grunnskolelova, fagopplæringslova og lov om vidaregåande opplæring vert samla i ein paragraf og ført vidare i ei ny lov. Det blir foreslått å lovfeste arbeidet mot mobbing.

Framlegget inneber at det i framtida skal stillast krav om politiattest for personar som skal bli tilsette i grunskolen, slik reglane i dag er for barnehagane. Personar som er dømde for seksuelle overgrep mot barn, vil bli stengde ute frå arbeid i grunnskolen. Det blir vidare gjort framlegg Ä

om at stillingsvernet for undervisningpersonellet i framtida skal regulerast av arbeidsmiljølova, på lik linje med andre kommunalt eller fylkeskommunalt tilsette.

Retten og plikta til opplæring, skal ikkje vere avhengig av om barnet oppheld seg lovleg i landet, men vere knytt til lengda på opphaldet.

Morsmåls- og norskopplæring for språklege minoritetar vert forskriftsfesta. Det blir foreslått lovreglar om rett til teiknspråkopplæring for høyrselhemma elevar og førskolebarn.

Lovframlegget inneber rett til opplæring i samisk i grunnskole og i vidaregåande skole. Retten til opplæring i samisk i vidaregåande skole er ikkje avhengig av om eleven har hatt slik opplæring i grunnskolen. Sametinget vil få større innverknad på innhaldet i den samiske opplæringa og får rett til å vedta delar av læreplanverket.

Framlegget inneber òg ein lovfesta rett til opplæring i finsk dersom minst tre elevar på ein skole i Troms eller Finnmark krev det.

Det blir gjort framlegg om å lovfeste prinsippet om tilpassa opplæring. Alle elevar som får spesialundervisning i grunnskolen og vidaregåande opplæring, skal ha rett til ein individuell opplæringsplan med krav til mål og innhald i opplæringa. Medverknaden frå elev og foreldre i samband med vedtak om spesialundervisning blir styrka.

Framlegget klargjer prinsippet om at elevane skal gå på den grunnskolen som ligg nærast.

Prinsippet om aldersblanding ved mindre grunnskolar vert ført vidare. Lovframlegget opnar for aldersblanding innanfor hovudtrinna dersom omsynet til elevane talar for dette.

Det blir gjort framlegg om eit strengare rektorkrav enn det lovutvalet gjer framlegg om og gjeldande reglar føreset. Dette gjeld både storleiken på skolane som skal ha rektor, og når det gjeld å vere rektor ved fleire skolar.

Departementet går inn for den normaliseringa av stillingsvernet for undervisningspersonellet som lovutvalet gjorde framlegg om. Dette inneber at det i framtida skal vere arbeidsmiljølova som regulerer oppseiingsvernet for lærarane, på same måte som for andre kommunalt eller fylkeskommunalt tilsette.

Framlegget klargjer krava til privat heimeopplæring og kommunen sitt ansvar for tilsyn. Kommunen skal krevje at barnet eller den unge skal gå i skole dersom dei krava lova med forskrifter stiller til heimeopplæringa, ikkje er oppfylte.

Nasjonale standardar blir førte vidare. Dette gjeld maksimal klassestorleik, utdanningskrav til lærarane, felles bindande læreplanverk, bindande timeramme, krav til arbeidsmiljø og godkjenning av lærebøker.

Kontaktpersonar:

Underdirektør Geir Helgeland, tlf. 22 24 75 10

Prosjektleiar Bjørn Tore Kjellemo, tlf. 22 24 76 49

Ot. prp. nr. 36 er lagt ut på ODIN med denne adressa: http://odin.dep.no/repub/96-97/otprp/36/

Kortversjonen av ot.prp.nr.36 har denne adressa: http://odin.dep.no/kuf/publ/ot-prp36k/