Reform 94: 92 prosent av søkjarane er tekne inn på førsteønsket sitt
Historisk arkiv
Publisert under: Regjeringen Jagland
Utgiver: Kirke-, utdannings- og forskningsdepartementet
Pressemelding | Dato: 29.07.1997 | Sist oppdatert: 21.10.2006
Pressemelding
Nr. 067-97
29. juli
Reform 94: 92 prosent av søkjarane er tekne inn på førsteønsket sitt
Til no har ca 143 000 av fylkeskommunanes eigne søkjarar fått tilbod om skuleplass. Førebels er om lag 9 prosent av søkjarane utan tilbod. Tala gjeld førsteinntaka til dei fylkeskommunale vidaregåande skulane. Dette går fram av statistisk materiale frå fylkeskommunane, innhenta i juli av Kyrkje-, utdannings- og forskingsdepartementet. Oversikta viser berre søkjarar og inntekne til skuleplass.
Heile 96 prosent av søkjarane med rett til vidaregåande opplæring er inntekne på førsteinntaket. Av dei inntekne søkjarane med lovfesta rett til vidaregåande opplæring har om lag 92 prosent komme inn på førsteønske sitt. Det tilsvarande talet for dei som er utan lovfesta rett, er 82 prosent.
I underkant av 15 000 søkjarar til skuleplass står utan tilbod ved førsteinntaket. Om lag 4 900 av desse søkjarane har lovfesta rett til vidaregåande opplæring. Dette utgjer ca 3 prosent av det totale søkjartalet. Det inneber at det er færre søkjarar som står utan tilbod i år enn på same tidspunkt i fjor. Dei fleste utan tilbod er søkjarar til kurs innanfor studieretningane helse- og sosialfag, formgivingsfag, hotell og næringsmiddelfag. Alle desse kursa har ei overvekt av kvinner blant søkjarane. Særleg helse- og sosialfag er, som tidlegare, svært populært hos jentene.
Erfaringane viser at situasjonen endrar seg mykje i løpet av inntaksprosessen. Først ved skulestart vil ein kunne sjå det endelege resultatet av inntaket til dei vidaregåande skulane.
Ved skulestart i 1994 stod ca 18 000 søkjarar utan tilbod, mens det i 1995 var om lag 10 600. I 1996 var det ca 6 700 søkjarar utan tilbod ved skulestart, men pr 1. oktober same år var dette talet redusert til 3 100. Dei endelege tala for 1997 blir truleg enda lågare.
- At 92 prosent har fått oppfylt førsteønsket sitt allereie no, er med på å sikre motivasjon og arbeidsinnsats hos dei unge, seier statssekretær Astrid Søgnen i Kyrkje-, utdannings- og forskingsdepartementet, i ein kommentar.
- Sjølv om presset frå søkjarane framleis er størst innanfor studieretningane helse- og sosialfag, formgivingsfag, hotell og næringsmiddelfag, har eg det håp at det skal blir betre samsvar mellom inntak og tilgang på læreplassar, seier Søgnen.
- At så mange utan lovfesta rett har fått tilbod, er ei gledeleg utvikling, og tala viser at Reform 94 også er ei reform for dei vaksne. Det er viktig at fylkeskommunane no utnyttar høvet til å gi alle vaksne eit tilbod om opplæring. På den måten kan fylkeskommunane sikre at minimumskravet til omfang av vidaregåande opplæring blir oppfylt, seier Søgnen.
Søkjarar og inntekne til skuleplass ved dei fylkeskommunale førsteinntaka
Gjeld søkjarar og inntekne frå eige fylke.
Skuleåret 1997-98
Fylkeskommune | Søkjarar med rett | Søkjarar utan rett | Søkjarar, totalt | Inntekne med rett | Inntekne utan rett | Inntekne, totalt |
Østfold | 6435 | 1367 | 7802 | 6386 | 738 | 7124 |
Akershus | 14749 | 1522 | 16271 | 14326 | 950 | 15276 |
Oslo | 6803 | 1313 | 8116 | 6334 | 788 | 7122 |
Hedmark | 5915 | 1257 | 7172 | 5890 | 754 | 6644 |
Oppland | 4987 | 1018 | 6005 | 4845 | 508 | 5353 |
Buskerud | 7497 | 1275 | 8772 | 7348 | 883 | 8231 |
Vestfold | 7015 | 1278 | 8293 | 6933 | 617 | 7550 |
Telemark | 5476 | 1180 | 6656 | 4541 | 583 | 5124 |
Aust-Agder | 3731 | 656 | 4387 | 3655 | 400 | 4055 |
Vest-Agder | 5744 | 1059 | 6803 | 5110 | 662 | 5772 |
Rogaland | 11313 | 1123 | 12436 | 10589 | 168 | 10757 |
Hordaland | 14965 | 2563 | 17528 | 14526 | 1567 | 16093 |
Sogn og fjordane | 3279 | 493 | 3772 | 3148 | 347 | 3495 |
Møre og Romsdal | 9215 | 1715 | 10930 | 9207 | 1162 | 10369 |
Sør-Trøndelag | 6924 | 1111 | 8035 | 6850 | 577 | 7427 |
Nord-Trøndelag | 4767 | 1195 | 5962 | 4746 | 838 | 5584 |
Nordland | 8556 | 1883 | 10439 | 8438 | 926 | 9364 |
Troms | 5000 | 1001 | 6001 | 4807 | 658 | 5465 |
Finnmark | 2032 | 610 | 2642 | 1854 | 432 | 2286 |
SUM | 134403 | 23619 | 158022 | 129533 | 13558 | 143091 |