Rundskriv F-038-97

Saksnr. 97/1106

20.03.1997

Folkehøgskolar Fylkeskommunar Kommunar Universitet Høgskolar Statens utdanningskontor

St meld nr 51 (1995-96) Om folkehøgskolen og utdanningssamfunnet - vedtak i stortinget.

1.Vedtaka

Stortinget behandla 14. januar i år St meld nr 51 (1995-96), og gjorde vedtak i samsvar med Innst S nr 91 (1996-97) Innstilling frå kyrkje-, utdannings- og forskingskomiteen om folkehøgskolen og utdanningssamfunnet. St meld nr 51 (1995-96)

I.

Stortinget ber Regjeringa vidareføre dagens ordning for folkehøgskolen med ei minimumsgrense for tilskott på 35 elevar i gjennomsnitt dei fire siste åra.

II.

Stortinget ber regjeringa oppretthalde ekstravekting av kortkurs for folkehøgskolen etter noverande ordning.

III.

Med verknad frå skoleåret 1997-98 skal 35 pst-regelen m.o.t. skolane sine eigne lærekrefter på kortkurs gjelde som snitt på årsbasis og lærarar ved andre nordiske folkehøgskolar bli godkjende på lik line med eigne lærarar

IV.

Med verknad frå og med skoleåret 1997-98 skal elevar som gjennomfører eit folkehøgskoleår på 33 veker, få utteljing i form av tre konkurransepoeng ved opptak til høgre utdanning i tillegg til alderspoeng, under føresetnad av skoledokumentasjon og registrert elevframmøte på 90%.

V.

Med verknad frå og med skoleåret 1997-98 skal elevar som vel å ta folkehøgskolen som siste år i eit fireårig løp, ha rett til utvida minstestipend til dei er 20år.

VI.

Stortinget ber Regjeringa oppretthalde og vidareføre driftstilskottet i samsvar med § 17 i Lov om folkehøgskolar http://www.lovdata.no/all/tl-19840608-064-0.html.

VII.

Stortinget ber Regjeringa gjere ein gjennomgang og ei vurdering av bruk av poeng for andre utdanningstilbod m.v. enn folkehøgskolane ved opptak til høgre utdanning. Dette vert å leggje fram som sak for Stortinget.

VIII.

St. meld. nr. 51 (1995-96)- om folkehøgskolen og utdanningssamfunnet http://www.dep.no/repub/95-96/stmld/51/- vert lagd ved møteboka.

2. Iverksetjing av vedtaka

Departementet arbeider med iverksetjing av vedtakene og kan gi følgjande informasjon om dei forskjellige punkta:

2.1 Minimumsgrense for tilskott og ekstravekting av kortkurs (I og II)

Her er det inga endring i gjeldane ordning.

2.2 Undervisning av skolen sine eigne lærarar på kortkurs (III)

Frå og med skoleåret 1997-98 gjeld følgjande:

Regelen om at skolens eigne lærarar skal ha minst 35% av undervisninga på kortkurs gjeld for den samla kortkursverksemda i kalenderåret. Skolen skal ha det pedagogiske og administrative ansvaret for alle kurs, og det er ein føresetnad at skolens eigne lærarkrefter er med på alle kurs.

Med eigne lærarkrefter meiner ein lærarar som er tilsett ved skolen og er ein del av det faste personalet. Det er ikkje høve til å vere både lærar og elev på same kurs.

Når lærarar ved andre nordiske folkehøgskolar er engasjert til å undervise, vert dei rekna som skolens eigne lærarar.

2.3 Høve til å få konkurransepoeng for folkehøgskoleelevar ved opptak til høgre utdanning (IV)

Denne ordninga kan gjelde frå og med skoleåret 1997-98. Ein føresetnad er at skolar som vil vere med på ordninga, utarbeider sin eigen skoledokumentasjon. Departementet skal sende ut retningsliner for utarbeiding av skoledokumentasjon og registrering av elevframmøte. Arbeidet skal gjennomførast slik at dei skolar som ønskjer det, kan få sende inn dokumentasjon til departementet for vurdering, og få høve til å gi konkurransepoeng frå og med skoleåret 1997-98.

Retningsliner for utarbeiding av skoledokumentasjon vil komme til skolane kring 1. mai. Ingen skolar må sende inn materiale før dei har fått retningslinene frå departementet. Siste frist for innsending vil bli 1. november.

2.4 Utvida rett til minstestipend for folkehøgskoleelevar (V)

Dette vedtaket føreset ei løyving av nødvendige midlar frå Stortinget. Når denne ligg føre, vil det bli sendt ut orientering og supplering av forskriftene for Statens lånekasse.

2.5 Gjennomgang og vurdering av bruk av poeng for andre utdanningstilbod ved opptak til høgre utdanning (VII)

Departementet arbeider med denne saka og vil komme med ei Stortingsmelding om rangering av søkjarar ved opptak til studium ved universitet og høgskolar.

3 Andre saker frå Stortingsmeldinga (VIII)

3.1 Folkehøgskolen og andre utdanningar

Meldinga slår fast det som lov og regelverk for folkehøgskolen seier, jf rundskriv F-5-91 og F-74-94:

Folkehøgskolen skal ikkje nytte planar frå andre utdanningsinstitusjonar eller tilby opplegg som fører fram til eksamen. Skolane har ikkje, og bør ikkje ha, høve til å undervise etter læreplanar for vidaregående opplæring, gi tilbod om halvårseiningar, eller leggje opp til "Examen philosophicum" ut frå planar frå universitet eller høgskolar. Vil skolar gå inn på slik verksemd, må dei søkje om å bli heimla under gjeldane lovverk, og godkjenning for driftstilskott etter folkehøgskolelova fell bort.

Skolane må sørgje for at verksemd og planar er i samsvar med dette.

3.2 Folkehøgskolen og funksjonshemma

Departementet skal, med utgangspunkt i tilhøva i dag, gå igjennom heile saksområdet for å sikre gode og formåltenelege ordningar. Folkehøgskolerådet og Funksjonshemmedes fellesorganisasjon vil bli med i dette arbeidet.

3.3 Diverse saker

Med bakgrunn i St meld nr 51 (1995-96) og stortingsdebatten 14. januar 1997, arbeider departementet vidare med m a desse sakene:

• Folkehøgskolen og utlendingar
• Folkehøgskolen og pensjonistar (tilskottsordning for pensjonistskolane)
• Kapitaltilskott, romprogram og fastsetting av internatkapasitet

Eventuelle lov- eller forskriftsendringar som følgje av dette arbeidet vil ein komme tilbake til seinare.

Med helsing

Anne Skomedal e.f. underdirektør

Tormod Hægeland tilsynsmann

Lagt inn 24. november 1999 av Statens forvaltningstjeneste, ODIN-redaksjonen