Pressemelding

Dato 24.03.97

Miljøvernminister Thorbjørn Berntsen:

Aksjon vannmiljø:

Miljøverndepartementet gir 10 mill. kroner til miljøtiltak i vassdrag og kystområde

Miljøvernminister Thorbjørn Berntsen har fordelt nærare 10 mill. kroner til kommunale miljøprosjekt i vassdrag og sjøområde for 1997. Prosjekt i alle fylke er tilgodesett. Sentrale tiltak i 1997 er restaurering av gamle kulturminne langs vassdrag og i kystområda. Store summar er brukt rundt i kommunane for å betre tilgjenget for folk flest i desse områda, seier miljøvernministeren.

Gjennom prosjekt rundt i kommunane medverker Aksjon vannmiljø til at folk flest i større grad får glede av dei betringar av vatnkvaliteten som er oppnådd ved gjennomførte rensetiltak. Den auken i bruksverdien som blir oppnådd ved å auke tilgjenget for rekreasjon og friluftsliv og restaurere skadar på natur og kulturminne, har ført til at samfunnet har fått meir igjen for dei totale investeringane som er gjort i vassdrag og sjøområde.

Frå aksjonen starta i 1992 og t o m 1996 er det løyvt i overkant av 100 mill kroner til slike vatnmiljøprosjekt. Interessa for Aksjon vantnmiljø er framleis stor. Det syner responsen frå kommunane som i år har sendt inn søknader for nesten 25 mill kroner delt på 212 prosjekt. Sidan det er kulturminneår i år har Miljøverndepartementet prioritert prosjekt som kombinerer tiltak for friluftsliv, natur- og kulturminnevern. Det er lagt stor vekt på å prioritere prosjekt i alle fylke i landet. Sentrale tiltak i 1997 er restaurering av gamle kulturminne langs vassdrag og i kystområda, opparbeiding av turvegar langs vassdrag, og kombinasjonstiltak med t d opparbeiding av areal til bruk i undervisningssamanheng.

Fordelinga av midlane i år er gjort på grunnlag av framlegg til prioriteringar frå miljøvernavdelingane til fylkesmennene og Direktoratet for naturforvalting i samarbeid med Riksantikvaren. Miljøvernavdelingane til fylkesmennene vil i næraste framtid underrette dei aktuelle kommunane om fordelinga av midlane til dei enkelte prosjekt.

--------

Opplysningar om Aksjon vannmiljø får ein ved å vende seg til miljøvernavdelinga hos fylkesmannen i det enkelte fylke eller Direktoratet for naturforvalting v/Elisabet Rosendal (tlf. 73580781).

Vedlegg:

AKSJON VANNMILJØ, 1997

Statsbudsjettet kap.1442 post 65