Pressemelding

6. juni 1997

Reviderte forskrifter for Hardangervidda nasjonalpark, Skaupsjøen/Hardangerjøkulen landskapsvernområde og Møsvatn Austfjell landskapsvernområde

Regjeringa har i statsråd i dag vedteke reviderte forskrifter for Hardangervidda nasjonalpark, Skaupsjøen/Hardangerjøkulen landskapsvernområde og Møsvatn Austfjell landskapsvernområde.

Føremålet med forskriftendringane har i første rekke vore å redusere omfanget av motorferdsla innanfor nasjonalparken. Framlegget til endringar vart sendt på lokal høyring i februar 1995 og på sentral høyring i november 1995. Direktoratet for naturforvaltning (DN) har førebudd saka og m.a. hatt løpande kontakt med aktuelle kommunar under sakshandsaminga.

Hovudtrekket i endringane er at ansvaret for den daglege forvaltinga av verneområda på Hardangervidda skal overførast frå Statskog Vestlandet og kommunale, (statlege) utval til fylkesmennene i Hordaland, Buskerud og Telemark saman med tre fylkesvise (statlege) tilsynsutval. Utvala skal setjast ned av DN, på bakgrunn av kommunalt utpeikte representantar og vil i hovudsak ha forvaltningsmynde i saker om motorferdsle og ombygging og riving/gjenoppføring av bygningar.

Det skal opprettast fire stillingar med særskilde forvaltningsoppgåver innafor dei tre verneområda. Desse stillingane skal tilleggast oppgåver i den utøvande forvaltinga i felt, med ansvar for oppsyn, skjøtsel, informasjon, rettleiing og andre felttenester. Dei skal etter oppmodning eller på eige initiativ gje faglege råd og rettleiing som grunnlag for enkeltvedtak eller andre avgjersler som fylkesmannen eller tilsynsutvalet skal treffe og gje faglege råd og gjere framlegg i samband med utarbeiding av ein forvaltingsplan. Ein av stillingane skal ha ansvar for samordning av dei funksjonar og oppgåver som skal utøvast innafor ramma av dei fire stillingane.

Rådet for Hardangervidda skal omorganiserast og talet på representantar reduserast til 14 medrekna leiar og nestleiar. Nytt namn blir Samarbeidsrådet for Hardangervidda, og rådet skal framleis skal ha rådgjevande funksjon.

Regjeringa legg stor vekt på at motorferdsla i verneområda blir redusert, særleg innafor nasjonalparken, utan at ein slik reduksjon skal hindre høve til fortsatt å bruke området til tradisjonell verksemd så som landbruk, jakt og fiske. Det er innført endringar i regelverket som innskjerpar bruk av motorisert ferdsel.. Køyring på barmark skal reduserast m.a. ved at deler av eksisterande slepenett er teke ut av bruk. Det er ønskjeleg å redusere terrengskadane med køyring på barmark og få køyringa bort frå nokre av dei områda som er minst påverka av inngrep og særleg viktige område for villreinen. Ordninga med vedtektsfesta motorisert ferdsle med heimel i nasjonalparkforskrifta, er fjerna. All motorferdsle i nasjonalparken er såleis regulert direkte i forskrifta.

Noreg har eit særleg ansvar for å ta vare på villreinen i Europa og deira leveområde. Omsynet til villreinen på Hardangervidda må difor vege tungt i forvaltinga av vidda. Mellom anna ferdsle i kalvingsområdet for villreinen er særleg uheldig seint på våren. I kalvingstida er simlene svært sky, og uro kan gjere at simlene forlet nyfødde kalvar. Det er difor i forskrifta teke inn eit forbod mot all ferdsel i eit nærare kartfesta kalvingsområde - i tida 25. april til 31. mai. Organisert riding og hundekøyring krev særskilt løyve.

Reglane om byggjeverksemd er skjerpa. Eksisterande hytter og stølar kan likevel framleis haldast vedlike og nyttast slik som tidlegare.

Av omsyn til gjennomføring av sommar- og haustsesongen 1997, vil ikkje dei reviderte reglane ta til å gjelde før ved årsskiftet 1997-98.

Meir informasjon kan ein få ved å kontakte:

Direktoratet for naturforvaltning, tlf.: 90 02 32 42 (mobil) , kontaktperson:

seksjonssjef Olav Nord-Varhaug eller

Miljøverndepartementet, tlf.: 22 24 58 83, kontaktperson: rådgjevar Stein Kollungstad.