Pressemelding

Nr. 24/97
18.04.97

Senter for medisinsk teknologivurdering

etablert ved Sintef Unimed i Oslo

Sosial- og helsedepartementet ønskjer å byggje opp kompetanse for å føreta brei vurdering av etablerte eller nye metodar innan helsesektoren. Medisinsk teknologivurdering kan omfatte vurderingar som gjeld effekten for pasienten, samfunnsøkonomiske verknader, etiske og administrative konsekvensar.

Dei fleste andre land i Europa har i dei siste 10-15 åra etablert senter for å initiere, kvalitetssikre og implementere medisinske teknologivurderingar. Aktivitetar i Noreg har skjedd spreidd og ukoordinert. No ønskjer ein å samle og styrkje innsatsen ved å etablere ein einskap for medisinsk teknologivurdering.

I budsjett for 1997 er det sett av tre millionar kroner for å etablere og utvikle kompetanse for medisinsk teknologivurdering. I første omgang skal ein satse på å hente inn og systematisere eksisterande dokumentasjon om ulike metodar. Etter kvart skal det byggjast opp kompetanse til å ta vare på fleire element innanfor medisinsk teknologivurdering. Dette vil mellom anna vere å framskaffe resultatdata, samt arbeid med å spreie og implementere resultat. Departementet vil oppnemne ei fagleg gruppe for å sikre breidde og kontakt med dei mest aktuelle samarbeidsinstansane. Nettverksarbeid og tverrfaglegheit vil vere ein føresetnad for verksemda.

Einskapen vil verte etablert ved Sintef Unimed som er lokalisert i Oslo. Sintef Unimed har stor kompetanse og tilgang på data om helsetenesta som gir eit godt utgangspunkt. Det føreset at kompetanse skal verte bygt opp i nær tilknyting til eksisterande forskingsmiljø og til klinisk medisin. Teknologivurdering skal famne om metodar innan både somatisk sektor og psykisk helsevern. Departementet vil inngå ein avtale med Sintef Unimed om å organisere og finansiere verksemda. Deretter vil det verte utarbeida ein strategi for det vidare arbeidet.

Kontaktpersonar:

Avdelingsdirektør Gerd Vandeskog, tlf 22 24 87 06

Rådgivar Kirsti Strand, tlf. 22 24 87 09