Tre nye departement frå årsskiftet
Historisk arkiv
Publisert under: Regjeringen Jagland
Utgiver: Statsministerens kontor
Pressemelding | Dato: 20.12.1996 | Sist oppdatert: 21.10.2006
Tre nye departement frå årsskiftet
I tråd med endringar som vart vedtekne ved regjeringsskiftet 25. oktober, er det i statsråd i dag vedteke å opprette tre nye departement frå 1. januar 1997: Planleggings- og samordningsdepartementet (PSD), Nærings- og handelsdepartementet (NHD) og Olje- og energidepartementet (OED). Frå same tidspunktet vert Administrasjonsdepartementet og Nærings- og energidepartementet nedlagde.
Det er samstundes vedteke at statsråd Grete Knudsen frå 1. januar 1997 tek over styret av Nærings- og handelsdepartementet, at statsråd Bendik Rugaas tek over styret av Planleggings- og samordningsdepartementet, og at statsråd Ranveig Frøiland tek over styret av Olje- og energidepartementet.
Statssekretærane Nils Amund Røhne og Inger Karin Nerheim er frå 1. januar 1997 utnemnde til statssekretærar i Nærings- og handelsdepartementet, statssekretær Arve Bakke til statssekretær i Planleggings- og samordningsdepartementet, og statssekretær Liv Undheim til statssekretær i Olje- og energidepartementet.
Departementsråd Karl-Edwin Manshaus er frå 1. januar utnemnd til departementsråd i Olje- og energidepartementet, og departementsråd Brit Denstad til departementsråd i Planleggings- og samordningsdepartementet. Departementsråd i Nærings- og handelsdepartementet vil verte utnemnd seinare. Det øvrige personalet som er tilsett i stillingar som skal overførast til dei nye departementa, vil gjere teneste utan ny utnemning eller tilsetjing.
For meir informasjon viser vi til den pressemeldinga som vi i dag sender ut om kvart av dei nye departementa.
Lagt inn 20 desember 1996 av Statens forvaltningstjeneste, ODIN-redaksjonen