Pressemelding

Nr. 21/97
5. mars 1997

Albanske styresmakter må innleia dialog med opposisjonen, seier Utanriksminister Godal

• Utviklinga i Albania gir grunn til sterk uro og er eit trugsmål mot stabiliteten i heile regionen. Styresmaktenes bruk av vald mot demonstrantar kan ikkje godtakast og må stansast umiddelbart. Albanske styresmakter må snarast ta initiativ til ein meiningsfull dialog med opposisjonen, seier utanriksminister Bjørn Tore Godal i ein kommentar til utviklinga i Albania. Utanriksministeren tek til orde for at det snarast mogeleg må haldast nyval i landet i samsvar med alment anerkjende retningslinjer for frie og rettferdige val.

Utanriksminister Godal understrekar at Albania, som medlem av Organisasjonen for tryggleik og samarbeid i Europa (OSSE) er forplikta til å ivareta grunnleggande demokratiske rettar og menneskerettar og at innskrenkingar i ytrings- og pressefridomen er uakseptabel.

• Norge støttar aktivt opp under OSSE- inititativet om å senda ein spesialutsending til Albania for å ha samtalar med partane og rapportera om situasjonen, seier utanriksminister Godal og viser til at han har drøfta og lova støtte til den vidare oppfølging overfor OSSE-formannskapet, den danske utanriksminister Niels Helveg Petersen.
• Frå norsk side er vi og positive til det initiativ som Europararådet har teke om å senda ein parlamentarikardelegasjon til Albania, seier Godal, som gjerne ser deltaking av norske parlamentarikarar.