Pressemelding

Nr.10/97
13. februar 1997

Utanriksminister Godal fordømer dødsdommen mot Rushdie

• Norge fordømer på det sterkaste at iranske styresmakter framleis nektar å oppheva dødsdommen (fatwaet) mot forfattaren Salman Rushdie og andre som har vore involverte i utgjevinga av boka hans "Sataniske vers", seier utanriksminister Bjørn Tore Godal. Norge har i samband med åtteårsdagen for dødsdommen slutta seg til ei fråsegn frå EU som oppmodar iranske styresmakter om å ta utvetydig avstand frå dommen og fjerna det trugsmålet den representerer mot andre lands borgarar.
• Dødsdommen bryt med grunnleggjande menneskerettsprinsipp og normer for mellomfolkeleg samkvem og er eit utåleleg slag mot ytrings- og trykkefridomen, seier utanriksminister Godal. - At iranske styresmakter ikkje har gripe inn mot iranske institusjonar som har utlova belønning for den som gjennomfører dødsdommen mot Salman Rushdie, kan ikkje tolkast som noko anna enn manglande politisk vilje til å fjerna det trugsmålet dommen representerer.
• Norske styresmakter vil oppmoda andre land til å føra ein meir restriktiv politikk overfor Iran. Bare ein slik samordna politikk vil på sikt kunna ha nokon verknad overfor det iranske regimet, sier utanriksminister Bjørn Tore Godal.