Den marokkanske fiskeriministeren Thami el Khyari kjem på offisielt besøk til Noreg 6. til 11. august, i spissen for ein stor næringslivsdelegasjon. Besøket startar i Bergen. Deretter dreg delegasjonen til Trondheim og gjestar den internasjonale fiskerimessa Nor-Fishing. I Trondheim vert det politiske samtalar mellom Thami el Khyari og fiskeriminister Otto Gregussen.

Marokko er i ferd med å bygge ut fiskerinæringa si, både på flåtesida og industrisida, og har interesse av medverknad frå norske styresmakter og næringsliv. Besøket er ei oppfølging av eit næringslivsseminar i Casablanca i mai i år. Det norske forskingsskipet Dr. Fridtjof Nansen har i ei årrekke kartlagt fiskeressursane i marokkanske farvatn. I dei politiske samtalane vil dei to fiskeriministrane også drøfte spørsmål av felles interesse knytta til internasjonal forvalting og fiskeeksport.

Måndag 7. august besøker den marokkanske fiskeriministeren Havforskingsinstituttet sin havbruksstasjon i Austevoll, og dagen etter gjestar han Fiskeridirektoratet og Handelshøgskulen i Bergen. I Trondheim besøker han m.a. firmaet Oceanor ved sida av å delta på fiskerimessa.