Regjeringa har fastsett ei ny ordning med einingskvotar for konvensjonelle fartøy på eller over 28 meter. Einingskvotar inneber at fiskekvotar frå fleire fartøy i ein tidsavgrensa periode kan samlast på ein båt, mot at dei andre fartøya vert tatt ut av fisket.

- På denne måten får næringa sjølv høve til å tilpasse fangstkapasiteten og sikre eit betre driftsgrunnlag for dei attverande fartøya, seier fiskeriminister Otto Gregussen. – Saman med einingskvoteordningane som vart innført for torsketrålarane, ringnotfartøya og grønlandsrekeflåten tidlegare i sommar, og nye utskiftingsbestemmelsar som er innført eller vil bli innført for desse, har dei største fiskefartøya no fått gode rammevilkår, seier Gregussen.

Ordninga med einingskvotar for den konvensjonelle flåten omfattar i dag 98 fartøy på og over 28 meter. Dei fleste fiskar med line, nokre med garn og resten har ulike driftskombinasjonar, som også omfattar reketrål.

Dersom eit fartøy frå Sør-Noreg får tildelt einingskvote ved at fartøyet som går ut av fisket er frå eitt av dei fem nordlegaste fylka, vert einingskvoten avkorta med 20 prosent. Dette vert gjort for å bremse kvoteoverføringar frå nord til sør.