Fiskeridepartementet har fastsett regulering av hysefisket med konvensjonelle reiskapar (garn, line etc) nord for 62. graden i 2001. Den samla norske hysekvoten i 2001 er på 50.835 tonn. Det er 12.435 tonn meir enn i år. Den norske hysekvoten blir fordelt med 31.009 tonn til den konvensjonelle flåten og 19.826 tonn til trålarane.

Gruppekvoten til den konvensjonelle flåten vert delt med 5.582 tonn til fartøy på og over 28 meter og 25.427 tonn til fartøy under 28 meter. Fisket til fartøya under 28 meter skal gå over tre periodar. I første periode, som varer ut april, kan det fiskast 8.400 tonn hyse, i andre periode fram til 1. september er det sett av 8.513 tonn og i tredje periode, som varer ut året, 8.514 tonn.

Fartøy på eller over 28 meter kan fiske 68 tonn hyse. Dei som fiskar med line eller i kombinasjon med line må sette av 30 prosent av fartøykvoten til fisket etter 1. september.

I gruppa under 28 meter vert fisket regulert med maksimalkvotar etter lengda på fartøyet – 16 tonn for fartøy under 11 meter, deretter 20 tonn, 24 tonn, 28 tonn og 32 tonn for dei største mellom 23 og 27,9 meter.

Når det direkte fisket er stogga eller når det enkelte fartøyet har fiska sin maksimalkvote, kan fartøy under 28 meter likevel ha inntil 25 prosent bifangst av hyse ved landing, og inntil 50 prosent i dei enkelte fangstar. For dei fartøya under 28 meter som leverer fleire gonger i veka vert bifangsten avrekna på vekebasis. Fartøy under 28 meter kan ikkje fiske meir hyse som bifangst enn 50 prosent av fartøyet sin maksimalkvote. Bifangst som vert fiska før fartøyet har teke maksimalkvoten sin vert avrekna maksimalkvoten.