Fiskeridepartementet har fastsett regulering av rekefisket i Nordsjøen og Skagerrak for 2001. Den norske kvoten neste år er på 8.040 tonn. Av dette kan 3.310 tonn fiskast i norsk sone i Nordsjøen og 4.730 tonn i Skagerrak.

Den samla kvoten kan fiskast over tre periodar, kvar på fire månader. I den første perioden fram til 30. april kan 40 prosent av den samla kvoten fangast, i dei to neste periodane 30 prosent i kvar periode. Maksimalkvoten for det einskilde fartøyet er sett til 35 tonn i første periode og 30 tonn i kvar av dei etterfølgjande periodane.

For å kunne delta i rekefisket må fartøy over 11 meter ha levert reke i minst eitt av åra 1998, 1999 eller 2000.

I tillegg til den norske kvoten har Noreg fått overført 100 tonn reke frå EU som kan fiskast i EU-sona i Nordsjøen.