Regjeringa foreslår ei regelendring som gjer kommunane høgare inntekter frå eigedomsskatt på kraftanlegg.

Ved behandlinga av Ot.prp. nr. 47 (1999-2000) vedtok Stortinget å sette i verk nye reglar for verdsetjing av kraftanlegg frå 2001. I følgje Finansdepartementet sine anslag ville dette samla sett gje kraftkommunane om lag 915 mill. kroner i eigedomsskatt frå kraftanlegg i 2001. Dette låg til grunn for Stortingets vedtak.

Etter at Skattedirektoratet i haust la fram likningstal basert på dei nye reglane, viser det seg at kommunane sine inntekter blir om lag 730 mill. kroner samla sett. Dette er om lag 185 mill. kroner lågare enn berekna. Regjeringa ser derfor behov for å endra reglane for verdsetjing slik at dei kan bli iverksett frå 2001. Forslaget er i tråd med Stortinget sine føresetnader om kommunane sine inntekter. I Ot.prp. nr. 24 (2000-2001), som blir lagt fram i dag, har derfor Regjeringa foreslått å auke minimumsverdien for verdsetjing av kraftproduksjonanlegg frå den vedtekne satsen på 0,5 kroner/kWh til 1,1 kroner/kWh. Dette vil gi kommunane inntekter på om lag 925 mill. kroner i 2001.

Finansdepartementet vil komme tilbake med ei vurdering av dei nye reglane og eventuelle forslag til endringar i løpet av 2002.

Nye reglar for eigedomskatt på anlegg for kraftoverføring blir utsett til 2002

Dei nye reglane for verdsetjing av eigedomskatt på overføringsanlegg for elektrisk kraft blir utsett til 2002. Det er vedteke av Kongen i statsråd i dag. Utsetjinga, som ble varsla i juli i år, gjer kommunane meir forutsigbare rammer for budsjettarbeidet for 2001.

Då Stortinget vedtok kraftskattereforma i 1996 ble det avgjort at eigedomskatt på overføringsanlegg skal baserast på den skattemessige verdien til driftsmidlane, medan teknisk verdi blir lagt til grunn i gjeldande system. Tidlegare er det bestemt at dei nye reglane skal gjelde frå 2001. Det er usikkert om dei føresetnadene som ble lagt til grunn for dei nye reglane er oppfylt. Dette har mellom anna samanheng med at NVE sin prisregulering av overføringsanlegg er endra sidan kraftskattereforma. Det er derfor behov for ei fornya vurdering av dei nye reglane før dei blir sett i verk.