Finansminister Schjøtt-Pedersen vil måndag 16. og tysdag 17. oktober ha fire møter med EU-systemet:

• Måndag morgon den 16. oktober møter finansminister Schjøtt-Pedersen den franske finansministeren Laurent Fabius i Paris. Fabius er dette halvåret formann for EU sitt råd for økonomi- og finansministrar (Ecofin). Dei to finansministrane vil mellom anna drøfte økonomiske og politiske utfordringar i euro-området, skattespørsmål og problemstillingar knytte til sysselsetting. Møtet må sjåast i lys av dialogen som den norske regjeringa har med EU om monetære og økonomiske spørsmål.

• Måndag kveld den 16. oktober skal finansministeren ta del i det årlege møtet mellom finans- og økonomiministrane frå EU (Ecofin) og EFTA-landa. Møtet blir halde i Luxembourg, og på dagsordenen står mellom anna den makroøkonomiske utviklinga og politikken med særleg vekt på økonomiske verknader av høge oljeprisar. Eit anna hovudtema er utfordringar som følgje av aldrande befolkning, med vekt på verknader for arbeidsmarknaden og behovet for pensjonsreformer.

• Tysdag den 17. oktober er det planlagt møter med to EU-kommissærar i Luxembourg: I møtet med kommissær Frits Bolkestein, som har ansvaret for skattar, avgifter, toll og den indre marknaden, vil finansministeren drøfte spørsmål knytte til skattar og finansielle tenester. I møtet med kommissær Pedro Solbes Mira, som har ansvaret for Kommisjonen sitt arbeid med økonomisk politikk og ØMU, vil dagsordenen femne om fleire av dei problemstillingane som blir tatt opp i møtet mellom finansministrane Fabius og Schjøtt-Pedersen den 16. oktober.

Adresse for møtene i Luxembourg: Conferance Centre, Plateau de Kirchberg.

Finansministeren vil vere tilgjengeleg for presse i Luxembourg begge dagane etter nærare avtale.

Kontaktpersonar i Luxembourg:
Informasjonssjef Anne-Sissel Skånvik, mobil: 913 22 811

Ambassaderåd Johan Hjort, mobil: 32(0)477660382
(ikkje slå 0’en dersom ein ringer frå utlandet)
Ambassaderåd Halvor Hvideberg, mobil: 32(0)486581597