Det samla overskotet i statsrekneskapen og Statens petroleumsfond vart i 2000 på 164,4 mrd. kroner, syner statsrekneskapen for 2000 som vert lagt fram i dag.

Dei samla inntektene i statsrekneskapen for 2000 var 643,6 mrd. kroner medan utgiftene var på 490,2 mrd. kroner.

Statsrekneskapen inneheld ein omtale av hovudtrekka i finanspolitikken for 2000, endringar frå budsjett til rekneskap, samt omtale av inntektene og utgiftene for nokre særskilde satsingsområde.

I forhold til rekneskapen for 1999 vart den finanspolitiske innstramminga i 2000 på om lag 1/2 prosent av BNP for Fastlands-Noreg, målt ved endringa i det olje-, rente- og aktivitetskorrigerte budsjettunderskotet. Den reelle underliggjande utgiftsauken var i same periode på 1 3/4 prosent.

Av tala går det mellom anna fram at utgiftene til Folketrygda auka kraftig frå 1999 til 2000. Dei samla utgiftene til sjukepengar frå Folketrygda var i 2000 nær 21,8 mrd. kroner, ein nominell auke på 15,9 prosent frå 1999 til 2000.

Overførte løyvingar frå 2000 til 2001 vart på 8,7 mrd. kroner. Dei største overføringane er under Kommunal- og regionaldepartementet med 1,2 mrd. kroner, Samferdsledepartementet med 1,0 mrd. kroner, Forsvarsdepartementet med 1,0 mrd. kroner og Kyrkje-, utdannings- og forskningsdepartementet med 0,9 mrd. kroner.

Meldinga inneheld og rekneskapstala for Statens petroleumsfond. Statens netto kontantstraum frå oljeverksemda vart i 2000 på 161,4 mrd. kroner. Av desse vart 9,5 mrd. kroner ført tilbake til statskassa. Per 31.12.2000 var den bokførde verdien av fondet 386,6 mrd. kroner. Det er ein auke på 165,8 mrd. kroner frå i fjor.

Hovudtal for statsrekneskapen 2000

(Tal i mill. kroner)