Pressemelding

Nr.: 48-2000
Dato: 24.08.2000
Kontaktperson: Lovrådgjevar Toril M.Øie, tlf. 22 24 53 84

Strengare reglar om seksuallovbrot

Forbod mot grovt aktlaus valdtekt, sex-annonsar og kjøp av seksuelle tenester av personar under 18 år er sett i verk.

Når grovt aktlaus valdtekt no er ført inn i straffelova, er terskelen for å bli valdtektsdømd blitt senka. Dessutan er det no forbod mot annonsar der ein tilbyr eller etterspør seksuelle tenester. I tillegg er det blitt straffbart å kjøpe slike tenester av personar under 18 år.

Ein person som burde ha skjøna at seksualpartnaren ikkje ønskte samleie, kan no bli dømd for grovt aktlaus valdtekt. Ein slik situasjon kan vere om partnaren var rusa og difor ikkje klarte å setje seg mot den seksuelle omgangen. Grovt aktlaus valdtekt kan det og vere om gjerningsmannen har nytta såkalla "mild vald" eller "milde trugsmål". Situasjonen kan til dømes vere at offeret ikkje set seg mot seksuell omgang fordi ho er redd, og ein kan klandre gjerningsmannen for at han ikkje forstod dette. Strafferammen for grovt aktlaus valdtekt er fem år, men blir heva til åtte år ved skjerpande omstende.

Samstundes blir det no forbode for media å ta inn annonsar frå prostituerte og kundar der ein tilbyr eller etterspør seksuelle tenester. Den nye lova kriminaliserer og annonsøren, til dømes hallikar, kundar eller dei prostituerte sjølve.

Det er óg blitt forbode å kjøpe seksuelle tenester av personar under 18 år. Den prostituerte sjølv kan framleis ikkje bli straffa. Kor gamal kunden er spelar inga rolle så lenge kunden er over den kriminelle lågalderen på 15 år.

Forbodet mot barnepornografi er skjerpa. Frå no av er det óg straffbart å sjå barnepornografisk materiale mot betaling via internett. Det er ikkje lengre eit vilkår at materialet har blitt lasta ned.

Ein som lokkar ein person under 18 år til å la seg avbilde som eit ledd i kommersiell framstilling av film eller bilete med seksuelt innhald, kan no bli straffa. Dette gjeld og fotografen. Omgrepet "bilder med seksuelt innhold" omfattar og mjukpornografi for personar under 18 år.

Lovendringa gjeld frå 11. august 2000.