Torsdag 21. desember 2000 kl. 10.00 skal professor dr. juris Jon T. Johnsen overrekkje ei utgreiing der han tek føre seg spørsmålet om ein tiltalt som vert frikjend i ei straffesak bør kunne påleggjast å betale erstatning til ofra, og kva dei nærare vilkåra for dette eventuelt bør være. Justisminister Hanne Harlem vil ta i mot utgreiinga.

Professor Jon T. Johnsen fekk 21. desember 1999 i oppdrag å greie ut kva høve det er og bør være til å påleggje ein tiltalt som er frifunnen, å betale erstatning til den fornærma for den handlinga som frifinninga gjeld. Oppdraget vart gjeve som ein følgje av Høgsterett sin dom i Rt. 1999 s. 1363 der fetteren til Birgitte Tengs vart dømd til å betale erstatning til Birgitte Tengs sine foreldre, sjølv om fetteren vart frifunnen for straff.

I samband med overleveringa vil Johnsen gje ei kort framstilling av arbeidet med og innhaldet i utgreiinga. Johnsen har òg utarbeidd eit notat på to sider som vil bli delt ut i møtet. Pressa vil deretter få høve til å stille spørsmål til Johnsen.

Utgreiinga er trykt som NOU 2000: 33 "Erstatning til ofrene hvor tiltalte frifinnes for straff". Denne vil òg bli delt ut i møtet.

Overleveringa finn stad kl. 10.00 i justisministeren sitt møterom, (H-blokk, 7. etasje), regjeringskvartalet i Oslo. Adressa er Akersgata 42..