Pressemelding

Nr.: 16-2001
Dato: 12.01.2001

Kontaktperson: Informasjonskonsulent Stig Kolstad, tel: 22 24 51 18 Informasjonskonsulent Lise Steensland, tel: 22 24 51 07

Regjeringa om stortingsmeldingane: Store endringar i Nordland

Salten politidistrikt vert det nye namnet på Bodø politidistrikt. Lensmannsdistrikta Hamarøy, Værøy og Røst vert alle innlemma i Salten. I tillegg vert politidistrikta Helgeland og Rana slått saman. Lofoten og Vesterålen politidistrikt slås sammen med Senja og Narvik pd. Domstolgrensene justerast noko.

Fredag la Regjeringa fram to stortingsmeldingar med framlegg om å endre politi- og domstolsstrukturen i heile landet. Føremålet med politimeldinga er å nytte færre politifolk til leiing og administrasjon og få fleire ut på gata, noko som alt i alt skal gje folk ei betre polititeneste.

Politireforma gjer slutt på ein 100 år gamal politistruktur. Samstundes ønskjer Regjeringa å styrke domstolane si rolle som samfunnet sin framste konfliktløysar, ved å gjere domstolane mindre sårbare og skape større fagmiljø. Regjeringa har òg lagt vekt på å halde fram ein naudsynt nærleik til folk i distrikta.

Det nye Salten politidistrikt vert om lag like stort som Helgeland politidistrikt når det gjeld folketal, areal og talet på driftseiningar (12). Både båt, jernbane og flytrafikk har knutepunkt i Bodø. Leiinga til politidistriktet blir difor lokalisert der. Politimeisteren i Bodø er òg leiar for Hovudredningssentralen i Nord-Noreg.

Regjeringa meiner at det nye distriktet vil ha ein geografisk utstrekning som er godt tilpassa både samfunnsstrukturen og kriminalitetsbiletet i området. Værøy og Røst lensmannsdistrikt vert overført til Salten. Kommunikasjonen frå øygruppa er betre utbygd mot Bodø enn mot Lofoten.

Hamarøy lensmannsdistrikt (Narvik politidistrikt) har betre vegsamband med Bodø enn med Narvik, og tilhøva gjer det naturleg at distriktet vert overført til Bodø.

Leiinga til Mosjøen

Helgeland politidistrikt og Rana politidistrikt vert slått saman til eit nytt Helgeland politidistrikt med politimeisterembete i Mosjøen.

Rana vert, om framlegget vert vedteke, knapt 18 år gamalt som eige politidistrikt. Dei to industrisamfunna Mosjøen og Mo i Rana vil få felles politileiing slik dei hadde før delinga i 1984.

Politileiinga blir lagt til Mosjøen både på grunn av den sentrale plasseringa byen har i distriktet, og at mykje av ansvaret for kontinantalsokkelen er lokalisert her.

Ei samanslåing i distriktet gjer det no mogeleg med ei samordning av tenester, mellom anna UEH (utrykkingseining) og 112-teneste.

Kommunikasjonstilhøva i dei to distrikta har tidlegare vort diskutert. Regjeringa legg vekt på at reisetilhøva ikkje vil ha verknad internt i politidistriktet. Endringane vert ikkje merkbare for publikum.

Nordland fylke har i dag sju domstolar i Narvik, Bodø, Sortland, Svolvær, Mo i Rana, Sandnessjøen og Brønnøysund. Det vert ikkje samanslåing av domstolar i fylket.

Regjeringa gjer likevel framlegg om at Værøy og Røst vert overførte til domstolen i Bodø medan Rødøy kommune vil sokne til domstolen i Mo i Rana.

For å skape betre oversyn for folk erstattar Regjeringa benemningane byrett og heradsrett med tingrett.

Regjeringa går vidare inn for å effektivisere og betre tinglysingstenesta ved m.a. å gje Statens kartverk ansvaret for tenesta. Målsettinga er at kundar i framtida skal få alle offentlege opplysningar til eiendomsoverdraging, pantsetting og byggjesaker på same stad. (Sjå eiga pressemelding om tinglysing).

Sjå rikspressemld. om politi og domstolar: www.odin.dep.no/jd/norsk/aktuelt/pressem

Stortingsmeldingane er tilgjengelege på: www.odin.dep.no/jd/norsk/publ/stmeld/

Karta over framlegga for fylka vert òg tilgjengelege på internett. Nyttast dei, må ein oppgje kjelde (Statens kartverk).