- Fagernesfjellet Alpinanlegg i Narvik vil få eit tilskot til vidareutvikling i form av spelemidlar på særlege vilkår, seier statssekretær Roger Ingebrigtsen i Kulturdepartementet. Alpinanlegget vil kunne få 7,9 mill. kroner i spelemidlar i perioden 2001 - 2003.

Narvik kommune og Narvik Slalåmklubb har søkt om spelemidlar til vidareutvikling av Fagernesfjellet Alpinanlegg i samband med at anlegget skal være arena for VM i alpint for junior i 2002.

- Fagernesfjellet Alpinanlegg som er det største i sitt slag i Nord-Noreg, har gjort det mogeleg å arrangere internasjonale konkurransar i landsdelen. På dette grunnlaget har Kulturdepartementet behandla søknaden på særlege vilkår, sier statssekretær Ingebrigtsen. Han understrekar at anlegget er viktig for regionen, også utover det reint idrettslege.

Utbetaling kan først skje etter teknisk førehandsgodkjenning og godkjend finansieringsplan.