To nye statsstipendiatar

Kulturdepartementet gjer framlegg om nytt statsstipend til dominikanarinne dr. theol. Else-Britt Nilsen, Oslo og forfattar Jon Fosse, Bergen. Kvart av stipenda er på 257 700 kroner, som svarer til lønnssteg 35 i Statens lønnsplan. Stipenda er tidsavgrensa til stipendiatane når pensjonsalderen, som for tida er 67 år.

Else-Britt Nilsen er dominikanarinne og forskar. Ho har doktorgrad i teologi og magistergrad i sosiologi. Ho er hjelpelærar og forskar ved Det teologiske fakultetet, Universitetet i Oslo. Ho har ein brei vitskapleg og populærvitskapleg litterær produksjon.

Jon Fosse har ein sterk posisjon i norsk litteratur og teater. Teaterstykka hans er omsette til femten språk og vert oppførte stadig oftare på teater over heile Europa.