Kulturminister Ellen Horn vitjar Kina 7. – 13.mai. Det offisielle besøket omfattar Beijing, Shanghai, Kunming og Lijang.

Under vitjinga i Beijing har statsråd Horn invitert med seg dei norske musikarane Sidsel Endresen og Bugge Wesseltoft. Dei vil gi ein konsert under ei mottaking i den norske ambassaden. Dei skal også gi fleire workshops med kinesiske musikarar og musikk-studentar. Statsråd Horn legg vekt på å byggje bruer mellom norske og kinesiske kunstnarar som ledd i dialogen med Kina. I samband med vitjinga blir den norske filmen "Søndagsengler" vist i Beijing Filmakademi.

I Beijing skal statsråd Horn møte kulturminister Sun Jia Zheng for å drøfte kultursamarbeidet mellom Noreg og Kina. Møtet med informasjonsminister Ding Guang Gen finn stad i Folkets Store Hall, der det også blir gitt ein bankett. Horn skal møte viseminister for film Zhao Shi før ho vitjar Filmakademiet i Beijing. Ho skal også møte viseminister for idrett, Li Furong. Noreg og Kina har sidan 1996 hatt ei samarbeidsavtale på antidoping-området.

I Shanghai skal kulturminister Horn vitje hovudbiblioteket, Shanghai Museum og Shanghai Teater og skal også møte den politiske leiinga i byen.

I Lijang skal statsråd Horn på omvising i Gamlebyen, som står på Unescos verdsarvliste. Lijang er ein av ni byar på Verdsarvlista i Søraust-Asia, som er med på eit prosjekt for å utvikle ei berekraftig turistnæring. Noreg finansierer prosjektet, som Bangkok-kontoret til Unesco og det nordiske verdsarv-kontoret i Oslo har ansvaret for.