Kommunal- og regionaldepartementet gir inntil 3,5 millionar kroner til Sortland kommune i samband med utviding av kaianlegg i Sortland hamn.

Tiltaket omfattar bygging av 100 meter kaianlegg og tilrettelegging av eit område på 16 da til hamneformål. Prosjektet er kostnadsrekna til ca. 18 millionar kroner og gjeld fjerde byggjetrinn i Sortland kommune.

- Målet er å leggje til rette for regional næringsutvikling, forbetre rammevilkåra for næringslivet, og å vidareutvikle Sortland hamn som eit regionalt trafikknutepunkt, seier statssekretær Audun Tron i Kommunal- og regionaldepartementet.

Sortland hamn med terminalfunksjonar fungerer i dag som eit knutepunkt for gods- og persontrafikk for heile regionen, og for mottak og transport av fisk og fiskeprodukt. Kaianlegget er med på å styrkje denne funksjonen, og leggje til rette for næringsutvikling både i kommunen og i Vesterålen elles.