- Det har blitt tyngre for unge, sosialt vanskelegstilte, bustadslause, flyktningar og andre å etablere seg på bustadmarknaden. For å løyse vanskane treng vi ein solidarisk bustadpolitikk, seier kommunal- og regionalminister Sylvia Brustad. Ho viser til tiltakspakken "Ein solidarisk bustadpolitikk" som ho la fram i sommar på vegne av Regjeringa.

Regjeringa sitt framlegg til statsbudsjett for neste år inneheld fleire forslag som følger opp denne tiltakspakken.

• Husbanken skal gå meir aktivt inn i bustadbygginga i Oslo, andre større byar og pressområde. Ei utviding av låneramma i Husbanken med 2 milliarder kroner, frå 11 til 13 milliarder, gjer at Husbanken kan godkjenne høgare byggjekostnader og dessutan gi fleire og større lån i pressområda utan at det går ut over bustadbygginga i distrikta.

• Med auken i låneramma for Husbanken kan langt fleire unge og vanskelegstilte få etableringslån til å kjøpe eigen bustad. Kommunane blir oppmoda om å bruke ordninga med etableringslån aktivt, og dei skal få høve til å tilby fullfinansiering med etableringslån og å lempe på kravet til behovsprøving.

• Regjeringa foreslår ei satsing på utleigebustader og andre løysingar for unge og vanskelegstilte ved å auke aktivitetsnivået på bustadtilskotet med 152 millionar kroner. Det er ein auke på over 30 prosent i forhold til i år. Satsinga på bustadtilskot og etableringslån vil gjere det lettare for kommunane å tilby lån, tilskot og bustadløysingar til husstandar med dårleg råd, tilpassa deira bustadbehov og økonomiske evne.

• Buutgiftstaket i bustøtta er foreslått heva med 5 000 kroner året. Det vil seie at det kan godkjennast buutgifter opp til 55 000 kroner i året som grunnlag for bustøtte. Det er særleg barnefamiliar, pensjonistar i omsorgsbustader og andre husstandar som bur i dyrt i pressområda som vil nye godt av at buutgiftstaket blir heva.

• Regjeringa har i samarbeid med dei største byane sett i gang eit fleirårig prosjekt for å utvikle bustader og tenester for bustadlause. Siktemålet er å kunne gi dei eit heilskapleg bustad- og tenestetilbod. Prosjektet får støtte både av Kommunal- og regionaldepartementet og Sosial- og helsedepartementet.

• For å betre tilgjenget til bustader, skal det satsast meir på tilskot til installering av heis i eldre bygg. Dette vil gjere bustadene meir fleksible, slik at til dømes pleie- og omsorgstrengande kan bu lenger heime.

• Regjeringa foreslår auka bygging av studentbustader. Til neste år legg Regjeringa opp til at det kan bli sett i gang bygging av om lag 1000 nye studentbustader.

Regjeringa vil i haust følgje opp enda fleire av tiltaka i "Ein solidarisk bustadpolitikk", med nødvendige endringar i regelverk og andre tiltak.