- I forslaget til statsbudsjett tek Regjeringa eit lyft for fleire utlegiebustader og andre bustadløysingar for unge og vanskelegstilte, seier kommunal- og regionalminister Sylvia Brustad.

- Regjeringa vil auke aktivitetsnivået for bustadtilskotet med 152 millioner kroner, til 641 millioner kroner neste år. Det er ein auke på over 30 prosent og kan gi 750 - 1 000 fleire utleigebustader enn i år. For Regjeringa er det viktig at verkemidla i bustadspolitikken blir sett i samanheng, og at kommunane kan tilby unge og vanskelegstilte lån, tilskot og bustadløysingar som er tilpassa deira behov og økonomiske evne, seier Brustad.

Bustadtilskot er eit investeringstilskot som blir gitt ut både av Husbanken og kommunane. Tilskotet går til unge, funksjonshemma, flyktningar, sosialt vanskelegstilte og andre med svak økonomi, og kan brukast både til oppføring, utbetring og kjøp av bustad. Tilskotet går også til stiftingar, selskap og liknande som byggjer utleigebustader. Tilskotet utgjer vanlegvis 10 – 30 prosent av kostnadene.

Over budsjettet til Kyrkje-, utdannings- og forskingsdepartementet er det foreslått å auke bygginga av studentbustader, slik Stortinget bad om. Det kan da bli sett i gang bygging av 1 000 studentbustader neste år. Saman med satsinga på bustadtilskotet og auken av lånerammene til Husbanken, gjer dette det lettare å etablere seg på bustadmarknaden.