- Neste år vil Regjeringa satse meir på lettare tilkomst til bustader ved å gi tilskot til installering av heis i eldre bygg. Det vil gjere bustadene meir fleksible. Til dømes pleie- og omsorgstrengande og funksjonshemma kan bu lenger heime, seier kommunal- og regionalminister Sylvia Brustad.

Ved å stimulere til å byggje fleire heisar legg Regjeringa vekt på tilkomst og miljøomsyn. Det er ei oppfølging både av handlingsplanen for eldreomsorga og dokumentet om miljøomsyn i bustad- og byggjesektoren - Habitat II. Neste år skal tiltak for betre tilkomst til bustader prioriterast i Husbanken si tilskotsordning til byfornying og bustadkvalitet.

- Heis kan gjere kvardagen lettare for mange, og kan dessutan minske behovet for omsorgsbustader. Å installere heis er som regel svært samfunnsøkonomisk lønnsamt. Hamar kommune og Hamar og Omegn Boligbyggelag har vore spesielt aktive på dette området. Eg håper fleire kommunar følgjer Hamar sitt eksempel, seier Sylvia Brustad.