- Regjeringa set seg høge, men realistiske mål for distrikts- og regionalpolitikken, seier statsråd Sylvia Brustad i ein kommentar til statsbudsjettet.

- Hovudmålet vårt for distriktspolitikken er å halde ved like hovudtrekka i busetjingsmønsteret og sikre likeverdige levekår i alle deler av landet. Regjeringa vil prioritere utvikling av robuste regionar, utvikling av eit konkurransedyktig regionalt næringsliv med vekt på nyskaping og brei innsats for fornying av offentleg sektor. Ungdom og kvinner er prioriterte målgrupper, seier kommunal- og regionalministeren.

Satsing på nyskaping

Regjeringa foreslår å setje av 80 millionar kroner til ei særskilt satsing på nyskaping neste år. Ein del av satsinga går til eit nyskapingsprogram for kommersiell utnytting av marine ressursar og eit nytt e-handelsprogram. Satsinga på marine ressursar er ei fellessatsing mellom tre departement: Kommunal- og regionaldepartementet, Nærings- og handelsdepartementet og Fiskeridepartementet. Det nye e-handelsprogrammet er eit samarbeid mellom Kommunal- og regionaldepartementet og Nærings- og handelsdepartementet. Regjeringa vil øyremerkje 20 millionar kroner av etablerarstipenda til kunnskapsbaserte nyetableringar.

Satsinga på næringshagar blir ført vidare. For 2001 er det forslag om å løyve 26 millionar kroner. Føremålet med satsinga er å leggje til rette for å utvikle nye arbeidsplassar i kunnskapsnæringane i distrikta.

Regjeringa legg opp til at 40 prosent av distriktsutviklingstilskotet skal nyttast til kompetansetiltak i næringslivet i neste år.