Arbeidet med omstilling i utsette kommunar og regionar skal no overlatast meir til fylkeskommunane og til Statens nærings- og distriktsutviklingsfond (SND) sine distriktskontor. Tidlegare har Kommunal- og regionaldepartementet hatt oppgåva med å løyve midlar til omstilling i område med einsidig næringsstruktur. No får fylkeskommunane ansvaret for løyvingar til kommunar og regionar som har vore definerte som omstillingsområde sidan 1999. Distriktskontora til SND skal sterkare inn og ta ansvar for faglege råd og oppfølging.

- Regjeringa ønskjer at regionale styresmakter meir enn før skal arbeide med slik omstilling, seier kommunal- og regionalminister Sylvia Brustad. Ho legg til at omlegginga skal skje i nært samarbeid mellom departementet og kvar enkelt fylkeskommune.

Kommunal- og regionaldepartementet skal framleis behandle søknader der fylkeskommunen står som eigar av omstillingsprogram. Det gjeld tiltaka ”Morgenlandet” i Hedmark og Oppland, og ”Oppdrift” i Telemark og Aust-Agder.