Regjeringa vil minske talet på øyremerkte tilskot i 2002. I tillegg legg ho fram lang liste over 137 rapporteringskrav som vil bli enklare eller kutta heilt ut. Anna regelverk blir også enklare.

I Kommuneproposisjonen for 2001 la Regjeringa fram ei liste med framlegg til innlemming og avvikling av øyremerkte tilskot. Framlegget blir følgt opp i Kommuneproposisjonen for neste år. Regjeringa foreslår at tilskot for 3,6 milliardar kroner blir avvikla eller lagt inn i inntektssystemet til kommunane i 2002.

- Vi vil at kommunane så langt som mogleg sjølve skal avgjere kva dei skal nytta pengane til. Mest mogleg rammefinansiering og færre bindingar gjennom øyremerking er derfor vegen å gå, seier kommunal- og regionalminister Sylvia Brustad.

Kommunane og fylkeskommunane er i dag pålagde omfattande rapportering til staten. Som ledd i fornyinga av offentleg sektor har Regjeringa derfor prioritert arbeidet med å få til ei enklare og mindre krevjande rapportering. Føremålet er å minske den administrative belastinga i kommunesektoren og flytte ressursar til tenesteproduksjon.

Gjennomgang av statleg regelverk retta mot kommunesektoren

Forenklingar i samband med prosjektet ”Gjennomgang av statlig regelverk retta mot kommunesektoren” blei lagt fram i stortingsmeldinga Kommune, fylke, stat - en bedre oppgavefordeling. Dette blir det no arbeidd vidare med. Nokre framlegg er alt sende på høring. Fleire forenklingar skal gjennomførast.

Prosjektet er retta mot dagens regelverk, men det er viktig å ha fokus på innhaldet i statens regelstyring av kommunane og fylkeskommunane også i åra framover.