To millionar til arbeidet mot rasisme og diskriminering
Historisk arkiv
Publisert under: Regjeringen Stoltenberg I
Utgjevar: Kommunal- og regionaldepartementet
Pressemelding | Dato: 05.04.2001 | Sist oppdatert: 23.10.2006
Regjeringa har sett av to millionar kroner i år til arbeidet mot rasisme og diskriminering.
Pressemelding
Nr.: 47/2001
Dato: 05.04.2001
To millionar til arbeidet mot rasisme og diskriminering
Regjeringa har sett av to millionar kroner i år til arbeidet mot rasisme og diskriminering. Pengane skal vere tilskot til prosjekt som fremmer toleranse, dialog og samhandling i det norske samfunnet. Det har allereie kome inn mange søknader om tilskot.
Etter drapet på Holmlia i januar i år ønskjer kommunal- og regionalminister Sylvia Brustad konkrete tiltak mot rasisme og diskriminering. – Arbeidet vårt med å sikre lik behandling og å minske skilnadene mellom ulike grupper er minst like viktig no, etter massemobiliseringa mot vald og rasisme som følgde av drapet på Benjamin Hermansen, seier kommunal- og regionalministeren.
Regjeringa vil derfor støtte prosjekt som medverkar til toleranse og dialog, med særleg vekt på tiltak for ungdom. Regjeringa vil òg støtte tiltak for å få fleire ungdommar med minoritetsbakgrunn inn i organisasjonslivet, og tiltak som er med på å førebyggje og løyse akutte konfliktar i lokalmiljøet. Vidare legg ein vekt på at tiltaka involverer ungdom både i planlegginga og i gjennomføringa av prosjekta. – Vi meiner at deltaking og eigeninnsats skaper engasjement, noko som igjen fører til større toleranse, seier Brustad.
Utlendingsdirektoratet (UDI) skal behandle søknadene. Utførleg utlysing finst i Nyhetsbrev om norsk flyktning- og innvandringspolitikk, og på nettsidene til UDI og Kommunal- og regionaldepartementet. Søknadsfristen er 30. april 2001.