Kyrkje-, utdannings- og forskingsdepartementet sitt framlegg til budsjett for 2001 er på til saman 43,3 milliardar kroner. Dette er ein auke på 12,1 prosent i høve til vedtatt budsjett for 2000.

Sentrale framlegg:

Regjeringa satsar på forsking. Forskingsbudsjett for alle departementa er på ca. 10,4 milliardar kroner, ein auke på om lag 5 prosent

Kapitalen i Fondet for forsking og nyskaping blir auka med 3 milliardar kroner frå
1. januar 2001

Vidare satsing på kvalitetsutvikling av grunnskole og vidaregåande opplæring på til saman 520 millionar kroner. Dette inkluderer:

100 millionar kroner ekstra til IKT i opplæringa

100 millionar kroner til å føre vidare utlånsordninga for læremiddel i vidaregåande opplæring. I tillegg vil departementet arbeide for å utvikle læremiddel for Internett

387 nye studieplassar til å vidareføre auka opptak innan helsefaglege utdanningar og IKT-utdanningar. Dessutan 240 nye studieplassar til auka opptak innan psykologi, sjukepleie, IKT og almennlærarutdanning

100 nye doktorgradsstipendiatstillingar

40 nye postdoktorstillingar og 20 nye professorat er foreslått øyremerkt kvinner

1000 nye studentbustader

Auke løyvinga til Kompetanseutviklingsprogrammet for å vidareutvikle marknaden for etter- og vidareutdanning frå 50 til 100 millionar kroner

35 nye prestestillingar

Oversikt over KUF sitt budsjett :

Regjeringa tryggjer framtida når vi satsar offensivt på forsking og utdanning, seier statsråd Trond Giske. – Den auka satsinga på IKT i opplæringa skal ta oss vidare inn i kunnskapssamfunnet, seier Giske.

Forsking

Høgre utdanning

Grunnskole/vidaregåande opplæring

Utdanningsbistand

Vaksenopplæring

Utdanningsfinansiering

Kyrkje

Forsking

Ei hovudprioritering i åra framover er å styrkje den langsiktige, grunnleggjande forskinga. Som ein del av ei slik satsing foreslår Regjeringa å auke kapitalen i Fondet for forsking og nyskaping med 3 mrd. kroner frå 1. januar 2001. Avkastinga frå fondet vil i 2001 vere 203,5 mill. kroner, ein auke på 113,5 mill. kroner frå i år. I 2002 vil avkastinga vere om lag 410 mill. kroner.

Dei samla forskingsløyvingane over statsbudsjettet vil etter Regjeringa sitt framlegg utgjere ca. 10,4 mrd. kroner. Dette er ein auke på om lag 5 prosent eller vel 500 mill. kroner i høve til saldert budsjett for 2000. Korrigert for reduksjonen i FoU-løyvingane knytt til ferdigstillinga av det nye Rikshospitalet og Realfagsbygget ved NTNU, blir auken i den samla FoU-løyvinga om lag 7 pst.

Regjeringa foreslår å styrkje dei fem prioriterte områda i forskingspolitikken: langsiktig, grunnleggjande forsking, marin forsking, medisinsk og helsefagleg forsking, informasjons- og kommunikasjonsteknologi og forsking i skjeringsfeltet mellom energi og miljø.

Regjeringa ønskjer å auke forskingsinnsatsen til næringslivet. Regjeringa foreslår derfor å etablere ei tilskottsordning som skal gi næringslivet støtte til kjøp av FoU-tenester frå universiteta, høgskolane eller forskingsinstitutta. Regjeringa foreslår ei løyving på 200 mill. kroner til denne nye tilskottsordninga over budsjettet til Nærings- og handelsdepartementet.

Løyvingane til forsking over KUF sitt budsjett vil auke med om lag 5,8 prosent, korrigert for tekniske endringar. Den samla løyvinga vil vere på 4,6 milliardar kroner.

Som ledd i satsinga på grunnforsking er det sett av 25 mill. kroner til vitskapleg utstyr. Den auka satsinga skal også finansiere 100 nye doktorgradsstipendiatstillingar. 40 nye postdoktorstillingar og 20 nye professorat er øyremerkt kvinner.

Det er foreslått å løyve 3 mill. kroner til Det norske meteorologiske instituttet for å byggje den tredje verradaren i Noreg.

Det er foreslått å auke løyvinga til forskingsføremål i Noregs forskingsråd med 4,2 prosent til 638 mill. kroner. I tillegg skal avkastinga av Fondet for forsking og nyskaping på 203,5 mill. kroner disponerast av Forskingsrådet. Det er sett av midlar til å gjennomføre ei evaluering av Forskingsrådet. Evalueringa skal vere sluttført ved utgangen av 2001.

Kontaktpersonar:

Ekspedisjonssjef Grete Ek Ulland, tlf. 22 24 74 60

Rådgivar Live Haaland, tlf. 22 24 74 58

Høgre utdanning

Det blir i budsjettet for KUF foreslått å løyve om lag 14,6 milliardar kroner til høgre utdanning. Dette er ein auke på om lag 2,8 prosent i høve til inneverande års budsjett når det er korrigert for tekniske endringar.

Regjeringa vil føre vidare opptaksnivået på utdanningar med mangel på høgt utdanna personell, som informasjons- og kommunikasjonsteknologi (IKT)- og helsefaglege utdanningar. Det er difor foreslått å opprette 387 nye studieplassar på desse utdanningane.

Det er vidare prioritert å opprette nye studieplassar for å auke opptaket til ulike studium; 16 studieplassar til psykologi, 135 til sjukepleiarutdanninga og 60 til IKT-utdanningar. I tillegg er det foreslått å opprette 30 nye studieplassar i samband med etableringa av ei allmennlærarutdanning ved Høgskolen i Buskerud.

For å få eit betre samsvar mellom talet på søkjarar til høgre utdanning og talet på studieplassar, går regjeringa inn for å redusere talet på studieplassar med netto
2 160. Opptakskapasiteten på førskolelærar- og ingeniørutdanninga er foreslått redusert med respektive 590 og 280 studieplassar.

Departementet har godkjent at Høgskolen i Gjøvik får etablere sivilingeniørstudium (toårig påbygging) i elektronisk publisering og multimediateknikk med fagleg ansvar lagt til Kungliga Tekniska Högskolan, Stockholm. Høgskolen vil ta opp 30 studentar årleg frå hausten 2001.

Det er sett av 25 mill. kroner til vitskapleg utstyr. Vidare er det sett av midlar til 100 nye doktorgradsstipendiatstillingar, 40 nye postdoktorstillingar og 20 nye professorat (jfr. punktet forsking).

Løyvinga til studentbustader er auka med 44 mill. kroner. Dette gir rom for bygging av 1000 nye studentbustader i 2001.

I samband med at regjeringa satsar på IKT og breiband er det foreslått ei løyving på 10 mill. kroner for å oppgradere det elektroniske forskingsnettet for universitet og høgskolar.

Utstyrsløyvinga til Høgskolen i Agder er auka med 80 mill. kroner i samband med nybygg på Gimlemoen. Løyvinga til Arkitekthøgskolen er auka med om lag 14 mill. kroner til utstyr i samband med innflytting i nytt bygg hausten 2001.

Det blir og foreslått å løyve 10 mill. kroner til utstyr i det nye teorifagbygget ved Universitetet i Tromsø og 2 mill. kroner til utstyr i Urbygningen ved Univeristetet i Oslo.

Regjeringa vil føre vidare den auka løyvinga til kunsthøgskolane i 2001 med 6,5 mill. kroner.

I samband med departementets miljøhandlingsplan vil Museumsprosjektet bli ført vidare i 2001. Prosjektet skal mellom anna bidra til at informasjon knytt til samlingane ved dei naturhistoriske musea ved universiteta blir gjorde elektronisk tilgjengeleg.

Regjeringa foreslår å løyve 2 mill. kroner til Nasjonalt senter for romrelatert opplæring (NAROM) ved Andøya Rakettskytefelt AS i 2001.

Kontaktpersonar:

Ekspedisjonssjef Jan S. Levy, tlf. 22 24 77 00

Underdirektør Knut Sletta, tlf. 22 24 77 19

Grunnskole/vidaregåande opplæring

Det blir foreslått å løyve om lag 2,25 mrd. kroner til grunnskolen og 1,13 milliardar kroner til vidaregåande opplæring, til saman 3,4 mrd. kroner. Samla for begge skoleslaga er dette ein auke på 3,7 prosent i høve til inneverande år. Ei viktig årsak til veksten er den auka satsinga på IKT i utdanninga. Løyvinga til grunnskole og vidaregåande opplæring skjer i hovudsak over Kommunal- og regionaldepartementet sitt budsjett.

Regjeringa vil satse på kvalitetsutvikling i opplæringa og foreslår ei særskilt satsing på 520 mill. kroner til dette føremålet i 2001. Dei prioriterte områda er kompetanseutvikling for lærarane, forsøk med breiband og nettverk samt utvikling av elektroniske læremiddel. Inkludert i denne satsinga ligg:

Ei ekstra løyving på 100 mill. kroner til Informasjons- og kommunikasjonsteknologi (IKT) i opplæringa.

Vidareføring av utlånsordninga for lærebøker i vidaregåande opplæring på 100 millionar kroner. I tillegg vil departementet arbeide for å utvikle læremiddel for Internett.

Den særskilde satsinga på ungdomstrinnet vil bli halden ved lag i 2001.

I juni i år vart det inngått ny arbeidstidsavtale for lærarar som gav to ekstra lønnstrinn frå 1. august 2000. Kommunane er kompensert for dette. Arbeidstidsavtalen vil gi ei betre utnytting av lærarårsverket.

I samarbeid med Kulturdepartementet vil det bli sett i gang ei nasjonal satsing på kultur i skolen, under nemninga Den kulturelle skolesekken . Målet med satsinga er å styrkje og utvikle samarbeidet mellom grunnskolen og kulturlivet i kommunane. Tiltaket vil bli utvikla i nært samarbeid med kommunane og skoleverket.

Regjeringa vil halde fram med å styrkje innsatsen mot mobbing, problemåtferd og sosial utryggleik i skolen, og foreslår å løyve 5 mill. kroner på KUF sitt budsjett til oppfølging av handlingsplanen mot barne- ungdomskriminalitet. (Til saman 15 mill.) Satsinga er eit samarbeid mellom KUF, Barne- og familiedepartementet og Justisdepartementet. Departementet vil leggje vekt på å utvikle breie, tverrfaglege og praksisnære tiltak.

Det blir gjort framlegg om at det øyremerkte tilskotet til leirskoleopplæring skal gå inn i rammetilskotet til kommunane.

For å betre norsk ungdom sine kunnskapar om nord-sør-forhold, har departementet fastsett eit eige nord-sør valfag i vidaregåande opplæring.

Det blir foreslått å avvikle stimuleringstilskota til formidling og inntak av lærlingar med stort fråvere og svake karakterar. Vidare blir det gjort framlegg om å redusere tilskotet til opplæring for språklege minoritetar i vidaregåande opplæring.

Det blir og foreslått nokre mindre innstrammingar under kapitlet for private skolar. Tilskotsordninga for privateigde skole- og kyrkjebygg blir foreslått avvikla.

Kontaktpersonar:

Avdelingsdirektør Jan Ellertsen, tlf. 22 24 75 30

Avdelingsdirektør Tove Brekke , tlf. 22 24 75 12

Avdelingsdirektør Margaret Westgaard, tlf. 22 24 76 30

Avdelingsdirektør Fred-Arne Ødegaard, tlf. 22 24 74 47

Utdanningsbistand

110 millionar barn har i dag ikkje tilgang til eller får ikkje fullføre grunnskoleopplæring. Regjeringa vil satse på globalt samarbeid og utviklingshjelp på utdanningsområdet. Departementet har inngått avtale med NORAD om samarbeid slik at røynsler frå gjennomføring av norske reformer kan bidra til betre kvalitet i norsk bistandsarbeid. Departementet har samarbeid med utdanningsdepartementa i Nepal og Zambia om reformer i grunnskolen.

Kontaktperson: Ekspedisjonssjef Hanna Marit Jahr, tlf. 22 24 75 00,

Vaksenopplæring

Den samla løyvinga til vaksenopplæring vil utgjere om lag 1,37 milliardar kroner. Dette er ein auke på om lag 14,6 prosent eller vel 174 millionar kroner i høve til saldert budsjett for 2000.

Det blir foreslått å auke løyvinga til Kompetanseutviklingsprogrammet for å vidareutvikle marknaden for etter- og vidareutdanning frå 50 til 100 mill. kroner.

Regjeringa ønskjer i tillegg å føre vidare tiltak i samband med Kompetansereforma med 50 mill. kroner. Dei 50 millionane omfattar:

Det blir foreslått å føre vidare løyvinga på om lag 20 mill. kroner til utvikling av fleksible og effektive undervisningsmodellar som er tilpassa vaksne sine behov og Regjeringa ønskjer i 2001 å fokusere særskilt på vaksne med lese- og skrivevanskar.

Det blir foreslått å løyve om lag 20 mill. kroner til å føre vidare og vidareutvikle eit system for dokumentasjon og verdsetjing av realkompetanse inn mot vidaregåande opplæring.

Det blir foreslått å føre vidare løyvinga på 10 mill. kroner til kartlegging og setje i gang forsøk med grunnskoleopplæring for vaksne i nokre kommunar.

VOX - Vaksenopplæringsinstituttet

Som ledd i oppfølginga av Kompetansereforma blir tre statsinstitusjonar innafor vaksenopplæring slått saman til ein felles organisasjon, VOX, frå 1. januar 2001. VOX - Vaksenopplæringsinstituttet skal i hovudsak drive forsking og utviklingsarbeid innafor vaksenopplæringsfeltet i Noreg.

Læringssenteret

Læringssenteret blei etablert 1. september 2000. Læringssenteret skal vere eit nasjonalt kompetansesenter for heile utdanningssektoren, men særleg med grunnskolen og vidaregåande opplæring som nedslagsfelt. Ei sentral målsetjing for Læringssenteret vil vere å bidra til eit meir heilskapleg perspektiv på lærings-, forsøks- og utviklingsarbeid, forsking og vurdering.

Utdanningsfinansiering

Regjeringa vil sjå utdanningsfinansieringa i samanheng med stortingsmeldinga om høgre utdanning som byggjer på Mjøs-, Berg- og Aamodt-utvalet sine innstilingar. Det er difor ikkje lagt inn større endringar i år.

Departementet ønskjer å vidareføre Lånekassen si satsing på å betre kunde- og inkassobehandling, m.a. ved bruk av ny teknologi.

Ordninga med særstipend til 19-åringar på folkehøgskole er foreslått fjerna slik at desse no får stipend på lik line med andre elevar over aldersskilet.

Ungdom som får sitt livsopphald finansiert av barnevernet, kan søke om stipend i Statens lånekasse for utdanning. Dette er ei dobbeltfinansiering frå staten si side, og regjeringa foreslår difor å fjerne denne ordninga.

Regjeringa foreslår ei viss innstramming i gebyrstipendordninga med å redusere talet på fag som gir høve til å søkje om gebyrstipend.

Kontaktpersonar:

Fungerande ekspedisjonssjef Olav Vaagland, tlf. 22 24 76 62,

Avdelingsdirektør Hege Nilssen Foss, tlf. 22 24 76 18

Kyrkje

Budsjettet for kyrkje på KUF sitt budsjett er på 882 mill. kroner.

Det er foreslått å opprette 35 nye prestestillingar for 2001.

Departementet vil ha meir folkeleg deltaking ved kyrkjeval, og vil difor finansiere forsøk med å leggje soknerådsvalet i 2001 til same tid og stad som stortingsvalet for dei sokneråda som ønskjer det.

Statstilskottet til dei kyrkjelege fellesråda er ført vidare i 2001 med 85 mill. kroner. Tilskottet i 2000 var på 110 mill. kroner.

Pengetilskottet frå Opplysningsvesenets fond til felleskyrkjelege tiltak er 25 mill. kroner. I tillegg er det frå fondet budsjettert med 3 mill. kroner til det kyrkjelege medlemsregisteret og 3 mill. kroner til forprosjektet for langsiktige restaurering av Nidaros domkyrkje.

I samsvar med forslag i Revidert nasjonalbudsjett 2000 vil det bli oppretta eit forvaltingsorgan for Opplysningsvesenets fond frå 1. januar 2001.

Kontaktpersonar:

Avdelingsdirektør Thom M. Rafoss. tlf. 22 24 79 02

Avdelingsdirektør Jørn Hagen, tlf. 22 24 79 10

KUFs budsjettproposisjon