Det er ved førstninga av mai registrert 76 654 søkjarar til grunnutdanninga ved høgskolar og universitet her i landet, viser tal frå Samordna Opptak. Det tilsvarande talet på søkjarar på same tidspunkt i fjor var 75 235. Auken på over 1400 søkjarar inkluderer dei om lag 6000 som søkjer høgre utdanning på bakgrunn av realkompetanse, søkjarar over 25 år utan generell studiekompetanse.

Det samordna opptaket omfattar søkjarar til universiteta, dei fleste vitskapelege høgskolane og dei statlege høgskolane. Også nokre private høgskolar er med.

Den generelle søkinga viser framgang for dei utdanningstypane som lenge har slite med rekrutteringa. Sjukepleiarutdanninga har ein framgang i talet på søkjarar på 21,6 prosent frå 2000 til 2001, medan det i fjor var registrert tilbakegang på over 6 prosent. Når det gjeld allmennlærarutdanninga viser søkjartala ein framgang på 6,5 prosent frå same tidspunkt i fjor. Frå 1999 til 2000 var det ein tilbakegang til denne utdanninga på over 6 prosent. Også barnevernpedagogutdanninga og førskolelærarutdanninga har framgang på hhv 18,8 og 6,5 prosent frå same tidspunkt i fjor.

Søking til realfaga ved universiteta har hatt ein auke på 4,5 prosent. Studium som også har stor framgang er m.a. audiografutdanninga, arkitektutdanninga og ergoterpiutdanninga.

Ingeniørutdanninga har ein tilbakegang i talet på søkjarar på 6,5 prosent. Medisin har ein tilbakegang på 5,4, Odontologiutdanninga går tilbake med 11,8 prosent, 2-årig høgskolekandidatstudium med 12,7 prosent og maritim utdanning med 20 prosent.

Høgskolen i Finnmark er den høgskolen som har størst auke i talet på søkjarar med 42,6 prosent. Auken her skuldast i første rekkje at det er høvesvis mange som søkjer på bakgrunn av realkompetanse. Norges landbrukshøgskole (22,7) og Høgskolen i Nord-Trøndelag (17,8) har ein stor auke i søkjartalet, medan Idrettshøgskolen og Høgskolen i Vestfold er mellom dei institusjonane som har størst tilbakegang i søkjartal.

Universitet i Bergen og Universitetet i Tromsø har framgang i søkjartal på hhv 6,4 og 5, Universitetet i Oslo har 1 prosents framgang, medan søknaden til NTNU er på samme nivå som i fjor.

Tala representerer 99 prosent av den totale søkjarmassen. Søkjartala frå Handelshøgskolen BI kjem i tillegg. Det endelege søkjartalet for 2000 inkludert søkjarar på Restetorget og BI var 82 189.

Statssekretær Randi Øverland:

-Det er gledeleg at trenden når det gjeld søkinga til omsorgsutdanningane, førskolelærar- og allmennlærarutdanninga er på veg opp igjen. Dette gir oss eit godt håp om å fylle alle studieplassar også innan førskolelærar- og allmennlærarutdanninga. Det er og verdt å merke seg at interessa for realfag no er i ferd med å snu, og at fleire søkjer til desse faga ved universiteta. Men framleis trengst det eit krafttak for å snu den negative trenden som gjeld ingeniørutdanninga, seier Øverland.

Nærare opplysningar om søking til høgre utdanning får du ved lærestadene eller Samordna opptak(tlf. 22 85 88 00., tekst-tv NRK 1 side 480, Søkofonen 815 49 050).