Rådet har særleg lagt vekt på desse momenta:

• Restaurering og rekonstruksjon av det gamle Sælandstunet og andre kulturminne i nærmiljøet
• Framifrå landbruksdrift der kulturminne blir ivaretekne som naturlege og viktige element i heilskapen
• Formidlingsarbeid for skuleklassar og andre - til dømes som omvisar på fødestaden og diktarstova til forfattaren Arne Garborg, Jernaldergarden Lyngaland samt på talrike naturlosarrangement
• Tilrettelegging for ålmenta i form av stirydding, parkeringsplassar, infotavler m.m.
• Arbeid i kulturminnenemnda og i Time mållag

Grunneigaren, dugnadsleiaren, "restaureraren", organisasjonsmannen og informatoren Einar Sæland, kan stå som eksempel for heile landet, men kanskje særleg på Jæren der det moderne samfunnet utøver særleg høgt press på kulturminne og gamle kulturlandskap.

Sjølve tildelinga vil gå føre seg i Stavanger på møtet til Rogaland fylkesting tysdag den 5. desember i år.

Prisen består av ein plakett og ein sjekk på kr. 10 000,-.

Statens kulturminneråds pris er ein årleg pris som i 2000 vert utdelt for fjerde gong. Prisen går til kommunar, lag, foreiningar eller einskildpersonar, som på særleg måte har lukkast i å få fram eit heilskapleg kulturminnevern. I år var det 19 søkjarar frå heile landet til denne prisen. Her var svært mange sterke kandidatar, mellom anna Herøy kystmuseum i Møre og Romsdal og Egge historielag i Nord-Trøndelag, og rådet legg merke til og er glad for dei positive kreftene som arbeider for å hegne om våre kulturminne rundt om i landet.

Nærare opplysningar kan ein få hos leiar av Statens kulturminneråd,
Unni Mathisen, telefon 69 11 61 45
eller rådsekretær Magnar Bjerga, telefon 22 24 58 58.

Statens kulturminneråd skal arbeida for å fremja kulturminnevernet og gje råd til styresmaktene i saker som gjeld kulturminne.