Regjeringa ynskjer at ein større del av gassressursane skal takast i bruk innanlands. I budsjettet for 2001 fremmer Regjeringa forslag om å støtta eit større pilotprosjekt for bygging av gassrøyr. Regjeringa foreslår at pilotprosjektet vert gjennomført i Bergensområdet, og at det vert sett av 20 millioner kroner til formålet i 2001.

-Naturgass vil spela ei viktig rolle i ein meir miljøvenleg energipolitikk. På mange område kan gass erstatta meir forureinande energi, seier olje- og energiminister Olav Akselsen. -Naturgassen gjev og eit stort potensiale for ny næringsutvikling, verdiskaping og sysselsetting, både som energikjelde og som råstoff i industrien.

Regjeringa legg vekt på at naturgass blir ein integrert del av energi-, industri- og transportpolitikken. Det inneber mellom anna at bruk av naturgass til energiformål må passa inn som ein naturleg del av den stasjonære energiforsyninga. Gass kan og gje eit grunnlag for auka verdiskaping og sysselsetting i industrien. Bruk av gass i transportsektoren vert nærare omtala i Nasjonal transportplan.