Stortingsmeldinga om olje- og gassverksemda tek for seg sentrale problemstillingar i olje- og gasspolitikken. Regjeringa foreslår tiltak som er tilpassa endringar både på norsk sokkel og i dei internasjonale olje- og gassmarknadane.

I meldinga vert det fokusert på tiltak som skal betra konkurransekrafta på kontinentalsokkelen. Det blir mellom anna opna for nye aktørar på sokkelen. Regelverket skal forenklast, sakshandsaminga skal bli meir effektiv, og ein fastset tempo for tildelingar i Norskehavet og Nordsjøen.

-Tiltaka skal styrkja konkurransekrafta til kontinentalsokkelen slik at oljeselskapa også framover skal finna det attraktivt å byggja ut nye felt i Noreg. Dette skal sikra auka verdiskaping i næringa og inntekter til fellesskapen. Med denne meldinga gir me rammevilkår som gjer det mogleg å møta dei viktigaste utfordringane i næringa, seier olje- og energiminister Olav Akselsen.

Viktige tema i meldinga er internasjonalisering av verksemda, endringar i olje- og gassmarknaden og miljø. I eit særskilt kapittel vert helse, miljø og tryggleik i olje- og gassverksemda drøfta.

- Hovedbodskapen i meldinga er at dette er ei næring me ønskjer å satsa på, og som har framtida føre seg. Regjeringa vil leggja til rette for at ein kan vidareutvikla den verdifulle kompetansen som er opparbeidd i det norske oljemiljøet, og sikra aktivitet og arbeidsplassar i leverandørindustrien, seier olje- og energiminister Olav Akselsen.

Regjeringa legg opp til å ha konsesjonsrundar anna kvart år for Norskehavet. I tillegg vil oljeselskapa kvart år bli inviterte til å foreslå areal i Nordsjøen for utlysing. Søknadsdokumentasjonen vil bli forenkla. Regjeringa foreslår også at Stortinget gir Kongen fullmakt til å godkjenna utbyggingsprosjekt opp til 10 milliardar kroner.

Departementet vil nøye sjå på korleis ein gjennom konsesjonstildelingar kan leggja til rette for betre balanse i dei operative miljøa, slik at fleire kompetente selskap kan vidareutvikla operatørorganisasjonane sine i Noreg. Regjeringa er generelt positiv til at mindre oljeselskap, nedstraumsselskap og leverandørindustri tek del i lisensane på sokkelen.

link til oljemeldinga