Olje- og energidepartementet har gitt ny konsesjon for utanlandshandelen med kraft til Statnett SF og Nord Pool ASA. Konsesjonane legg til rette for at kraftutvekslinga med Danmark vert lagt om frå nyttår.

- Olje- og energiminister Olav Akselsen seier i ein kommentar at omlegginga av kraftutvekslinga med Danmark medverkar til ein meir open og integrert nordisk kraftmarknad. Det overordna prinsippet for all kraftutveksling med utlandet er å få ei mest mogeleg sikker og effektiv kraftutveksling, seier Akselsen.

Statnett SF har frå nyttår ansvaret for å organisera kraftutvekslinga med Danmark, i tillegg til utvekslinga med Sverige og Finland. Det er Nord Pool sine børsprisar som skal vera grunnlaget for kraftutvekslinga med desse landa.

Dei to kraftutvekslingsavtalane som Statkraft SF er part i og som i dag er grunnlaget for utvekslinga med Danmark, blir no gjort om til finansielle avtalar.

Dei nye konsesjonane er mellom anna ei oppfølging av at Stortinget nyleg slutta seg til Regjeringa si stortingsmelding om kraftutvekslinga mellom Noreg og Danmark. Ein viser i den samanheng til St.meld. nr. 9 (2000-2001) Om kraftutvekslinga mellom Noreg og Danmark og Innst. S. nr. 93 (2000-2001).