Regjeringa sitt budsjettforslag for Olje- og energidepartementet har ei utgiftsside på om lag 18,3 milliardar kroner og ei inntektsside på om lag 111 milliardar kroner. Dei viktigaste satsingane over departementet sitt budsjett er:

• Program for utvikling av renseteknologi for gasskraftverk
• Auka bruk av naturgass innanlands - pilotprosjekt
• Oppretting av nytt organ for omlegging av energibruk og energiproduksjon
• Sikring av liv og verdiar langs vassdrag som er utsette for kvikkleireskred

-Desse tiltaka viser den retninga vi ynskjer å gå i når det gjeld energipolitikken, seier olje- og energiminister Olav Akselsen. Bruk av gass og arbeidet med ny renseteknologi er prioriterte oppgåver, det same er omlegginga av energiproduksjon og –forbruk. Gjennomføring av desse tiltaka gjev miljømessige gevinstar og store moglegheiter for ny næringsutvikling.

Program for utvikling av renseteknologi for gasskraftverk
For 2001 gjer Regjeringa framlegg om å løyva 202,7 mill. kroner til kunnskapsoppbygging, forsking og utvikling over Olje- og energidepartementet sitt budsjett. Dette er ein auke på 6,3 mill. kroner, eller om lag 3,2 % i forhold til saldert budsjett 2000. Auken er ei oppfølging av satsinga på forsking i skjeringsfeltet mellom energi og miljø som er omtala i St. meld. nr. 39 (1998-99) Forskning ved et tidsskille. Auken skal i hovudsak nyttast til utvikling av renseteknologi for gasskraftverk. Regjeringa gjer framlegg om å auka løyvinga til utvikling av renseteknologi for gasskraftverk med vel 20 mill. kroner over budsjetta til Olje- og energidepartementet, Miljøverndepartementet og Nærings- og handelsdepartementet.

Innanlands bruk av naturgass – pilotprosjekt
Det er eit mål for Regjeringa at ein større del av naturgassen skal brukast innanlands. Regjeringa ynskjer i fyrste omgong å støtta eit større pilotprosjekt for bygging av gassrøyr som kan gjera gass tilgjengeleg for nye brukargrupper. Det er i den samanheng gjort framlegg om å setta av 20 mill. kroner i budsjettet for 2001. Regjeringa ynskjer at pilotprosjektet vert gjennomført i Bergens-området. Der er dei alt komne langt med å ta i bruk gass, folkegrunnlaget er stort og vegen til ilandføringsterminalane for gass er kort.

Omlegging av energibruk og energiproduksjon – nytt statleg organ
Omlegging av energibruk og energiproduksjon er eit prioritert område. For å styrkja dette arbeidet, vil Regjeringa etablera eit nytt statleg organ lokalisert i Trondheim. I den samanheng vil det bli fremja forslag om lovendring som gjer det mogleg å samla midla til omleggingsarbeidet i eit energifond som skal forvaltast av det nye organet. I dag forvaltar energiverka eit påslag over nettariffen og NVE dei statlege løyvingane. Det nye organet skal overta dette arbeidet. Regjeringa fremjar forslag om løyvingar på totalt 287,2 mill. kroner over statsbudsjettet for 2001 til tiltak retta mot omlegging av energibruk og energiproduksjon. Auka tilsagnsfullmakt gjer at aktivitetsnivået om lag vert ført vidare i 2001.

Auken i el-avgifta vil medverka til betre lønnsemd for enøk-tiltak, og for investeringar i varmeproduksjon basert på nye fornybare energikjelder og bruk av naturgass.

Sikring av liv og verdiar langs vassdrag som er utsette for kvikkleireskred
Det blir gjort framlegg om å auke løyvingane til forbygningsarbeid. Eit særskilt program vert sett i gang for sikring av liv og verdiar langs vassdrag som er utsette for kvikkleireskred. Programmet vil omfatta risiko- og sårbarhetsanalyser og eit overvakingssystem for tilsyn med område der risikoen for skred er særleg høg. Basert på informasjonen som kjem fram, vil vedlikehald og nybygg av sikringsanlegg bli gjennomført i prioritert rekkefølgje.

Petroleumsverksemda – SDØE
Statens samla netto kontantstraum frå petroleumsverksemda er budsjettert til om lag 189 milliardar kroner, ein auke på om lag 103,9 mrd. kroner i forhold til saldert budsjett 2000, og om lag 28,8 mrd. kroner i forhold til anslag på rekneskap 2000. Netto kontantstraumen består av om lag 87,8 mrd. kroner i netto inntekter frå Statens direkte økonomiske engasjement (SDØE) i petroleumsverksemda, 97,3 mrd. kroner i skattar og avgifter og 4 mrd. kroner i aksjeutbytte frå Statoil.

SDØE sitt driftsresultat er budsjettert til om lag 78,2 mrd. kroner for 2001. Dei kalkulatoriske tala for avskrivingar og renter som vert trekt frå ved berekning av SDØE sitt driftsresultat utgjer 26,5 mrd. kroner. Driftsresultatet er om lag 33,8 mrd. kroner høgare enn saldert budsjett 2000 og 20,7 mrd. lågare enn anslag på rekneskap 2000. Det vert no lagt til grunn ein gjennomsnittleg oljepris på 235 kroner pr. fat for 2000, og 180 kroner pr. fat for 2001. SDØE sin del av investeringane på norsk sokkel er budsjettert til om lag 16,2 mrd. kroner, ein reduksjon på 3,5 mrd. kroner samanlikna med saldert budsjett 2000 og ein nedgang på om lag 5,7 mrd. i forhold til anslag på rekneskap 2000.

Statsforetak
På inntektssida vert det budsjettert med i underkant av 1,1 mrd. kroner i renter og avdrag på lån til Statkraft SF og Statnett SF. Det vert budsjettert med utbytte frå Statkraft på 562,5 mill. kroner og Statnett på 250 mill. kroner.