Regjeringa har i statsråd i dag gjort framlegg om at ei delprivatisering av Telenor AS skal skje gjennom ein snarleg børsintroduksjon. Det blir lagt til grunn at børsintroduksjonen blir gjennomført seinast innan utgangen av 2001, men regjeringa arbeider med sikte på å gjennomføre transaksjonen hausten 2000.

- For å sikre at Noreg er langt framme når det gjeld informasjons- og kommunikasjonsteknologi, må Telenor få ny kapital og nye impulsar. Regjeringa ser det som viktig å sikre eit nasjonalt forankra eigarskap til Telenor og gjer framlegg om at staten skal oppretthalde 51 prosent eigardel i selskapet. Fordi det er få store norske private aksjonærar og småspararsegmentet av aksjemarknaden er lite utvikla i Noreg, er det naturleg at staten er ein langsiktig eigar i Telenor. For regjeringa er det viktig å leggje til rette for vidare næringsutvikling med basis i Noreg. Den aukande internasjonaliseringa innanfor telesektoren styrkjer også behovet for norsk eigarskap, seier samferdselsminister Terje Moe Gustavsen.

Som aksjonær i Telenor vil staten framleis konsentrere seg om spørsmål knytt til kapitalstruktur, lønnsemd og utbyttepolitikk, med vekt på langsiktig lønnsam forretningsutvikling og verdiskaping for aksjonærane. Regjeringa legg vekt på at dei statlege eigaroppgåvene blir utførte profesjonelt og i samsvar med vanleg forretningsmessig praksis. Kravet til kapitalavkasting bør liggje på samme nivå som for samanliknbare europeiske teleselskap. Kapitalstrukturen og utbyttepolitikken skal fremje verdiskapinga.

Ved børsintroduksjonen tar regjeringa sikte på å redusere staten sin eigardel med 15-25 prosent, gjennom ein kombinasjon av kapitalutviding (emisjon) og utsal av aksjar frå staten (spreiingsal). Det blir gjort framlegg om at regjeringa skal få fullmakt til avgjere om aksjekapitalen i Telenor skal utvidast med inntil 50 prosent av verdien av alle aksjane som blir selde ved børsintroduksjonen, men innanfor ei ramme på maksimalt 25 milliardar kroner. Avgjerder om dette blir tatt nærare tidspunktet for børsintroduksjonen. Det vil bli innhenta tilråding frå styret i Telenor i samband med ei slik avgjerd. Utgangspunktet for vurderinga av kapitalstrukturen vil vere forretningsstrategien og forretningsplanane til selskapet. Regjeringa ber om fullmakt til vidare sal av aksjar i Telenor gjennom ein kombinasjon av emisjon og spreiingsal, slik at staten sin eigardel utgjer minst 51 prosent.

Styret i Telenor AS ønskjer at det gjeldande soliditetsmålet på 42 prosent blir endra med sikte på straks å kunne setje i verk den vekststrategien som selskapet legg opp til. Dette fører til behov for auka ekstern opplåning. Etter styret si vurdering vil nedgangen i den bokførte eigenkapitalprosenten til selskapet vere forsvarleg. Gitt at selskapet har gode investeringsalternativ, finn Samferdselsdepartementet at selskapet kan auke gjeldsgraden sin.

I samband med børsintroduksjonen vil det bli varsla at det etter kvart kan bli aktuelt med separat børsnotering av delar av konsernet. Det vil ikkje bli invitert inn strategiske partnarar på eigarsida i kjerneverksemda i tida før børsintroduksjonen.

Aksjeordning for dei tilsette

Det vil bli etablert ei aksjeordning for dei tilsette i Telenor. Aksjeordninga skal utformast i samsvar med dei grensene som følgjer av skattelova. Det skal ikkje nyttast opsjonar i samband med børsintroduksjonen. Det blir elles lagt opp til at dei tilsette får tilbod om ei garantert minstetildeling.

Sal til småinvestorar

Det blir lagt opp til at Telenor-aksjen blir marknadsført aktivt i den norske marknaden. Småsparar vil bli gitt preferanse ved tildelinga av aksjar. Regjeringa legg ikkje opp til at det blir gitt prisrabattar eller liknande.

Holdingselskap

Det vil bli vurdert om det kan vere føremålstenleg å etablere eit nytt holdingselskap som øvste styringsorgan for selskapet.

Forvalting av statleg eigarskap

For mellom anna å medverke til at marknaden har tillit til at eigar- og regulatøroppgåvene i telesektoren er organiserte på ein føremålstenleg måte, legg regjeringa opp til at forvaltninga av det statlege eigarskapet til Telenor blir overført til Nærings- og handelsdepartementet så snart børsintroduksjonen er gjennomført.

Notering på børs

Samferdselsdepartementet og Telenor har engasjert DnB og Goldman Sachs som hovudtilretteleggjarar. Aksjane vil bli søkt noterte på Oslo Børs og kanskje også i USA. Ein har ikkje tatt endeleg stilling til tidspunktet for børsintroduksjonen, og heller ikkje kva for valuta aksjane skal noterast i. Salet av aksjar i Telenor innebær ei omplassering av statleg formue. Dei frigjorde midlane vil bli plasserte som innskot i Noregs Bank.