Ny E 16 Voldum - Seltun: Førebuande arbeid tar til i haust
Historisk arkiv
Publisert under: Regjeringen Stoltenberg I
Utgjevar: Samferdselsdepartementet
Pressemelding | Dato: 11.05.2001 | Sist oppdatert: 23.10.2006
Pressemelding
Nr.: 50/2001
Dato: 11.05.01
Ny E 16 Voldum – Seltun: Førebuande arbeid tar til i haust
Førebuande arbeide med bygging av ny veg på E 16-strekninga Voldum – Seltun i Sogn og Fjordane kan ta til i haust. Arbeidet omfattar mellom anna omlegging av kraft- og telefonliner i området, klargjering av riggområde og arbeid i samband med forskjering og tunnelpåhogg.
Dette går fram av ei orientering som er tatt inn i framlegg til ein del endringar i statsbudsjettet for 2001.
I orienteringa blir det vist til at utgiftene til det førebuande anleggsarbeidet i haust er rekna til fem millionar kroner. Beløpet vil bli dekt ved hjelp av innsparingar på tunnelprosjektet E 16 Lærdal – Aurland.
Prosjektet Voldum – Seltun omfattar bygging av to tunnelar, på 1,5 kilometer og 3 kilometer, i tillegg til bygging av ei ny bru over Lærdalselva. Kostnadsoverslaget er på 275 millionar kroner, og det er gjort framlegg om at anleggsarbeidet kan ta til i 2002. Den nye vegen skal etter planen opnast for trafikk i 2004.
For fleire opplysingar – sjå St.prp. nr. 76 (2000-2001) Om ein del saker på Samferdselsdepartementets område