Regjeringa har i statsråd i dag gjeve tilslutnad til at EFTA-statane og Makedonia inngår ei frihandelsavtale. Avtala vil verte underskriven på ministermøtet til EFTA i Zürich, 19. juni.

Avtala omfattar med få unntak handel med alle industrivarer og foredla landbruksvarer i tillegg til fisk og andre marine produkt. Noreg skal parallelt med frihandelsavtala skrive under ein bilateral landbruksprotokoll med Makedonia med omsyn til uforedla landbruksvarer.

Hovudmålet med frihandelsavtala er å medverke til økonomisk utvikling og politisk stabilitet i Makedonia gjennom betra vilkår for samhandelen. Frihandelsavtala vil venteleg ta til å gjelde 1. januar 2001.

Avtala går ut på at begge partane godtek frihandel for industrivarer og fiskeprodukt. Makedonia har fått overgangsordningar for avvikling av tollvernet på visse industrivarer og nokre få fiskeslag, medan EFTA-statane gjev tollfri tilgang for makedonske varer frå den dagen då avtala tek til å gjelde. Ved slutten av overgangsperioden vil det vere etablert full og gjensidig frihandel mellom partane.

Frihandelsavtala med Makedonia er den 15. frihandelsavtala som EFTA-statane har inngått med tredjestatar utanfor EU.