Utanriksdepartementet har i dag vedteke mellombels oppheving av flyforbodet mot Den føderale republikken Jugoslavia (FRJ). Det inneber at det blir opna for sivil lufttrafikk mellom Noreg og FRJ førebels fram til 28. august 2000. Endringane i føresegna om særlege tiltak mot Den føderale republikken Jugoslavia, er gjort for å letta tilhøva for kontakt med omverda for den politiske opposisjonen og sivilbefolkninga i landet.

Samstundes er lista over dei personane som vil bli nekta visum på grunn av tilknytning til president Milosevic sitt regime, blitt utvida. Føremålet er å oppretthalda det internasjonale presset mot styresmaktene med sikte på å fremja ei demokratisk og fredeleg utvikling i landet. Endringane inneber at Noreg held fram med dei same tiltaka mot FRJ som EU.

Føresegna trer i kraft straks.