På bakgrunn av hendingane i Den føderale republikken Jugoslavia (FRJ) var Noreg snøgt ute med å vedta lempingar i dei særlege tiltaka mot Det tidlegare Jugoslavia.

9. oktober vart det vedteke å endre føresegna om særlege tiltak mot FRJ, slik at oljeembargoen og flyforbodet vart oppheva med omgåande verknad. Samstundes vart det signalisert at oppheving av påbodet om frysing av finansielle midlar og forbodet mot overføringar og investeringar heile tida ville bli vurdert i lys av utviklinga.

Noreg har i samband med den offisielle vitjinga til president Kostunica i Noreg 31. oktober 2000 vedteke å avvikle det generelle påbodet om frysing av finansielle midlar og forbodet mot overføringar og investeringar til Det tidlegare Jugoslavia. Faren for at ei oppheving vil kunne bli misbrukt av enkeltpersonar med tilknyting til Milosevic, vert ikkje lenger ansett å vere tilstades, seier utanriksminister Thorbjørn Jagland.

Tiltaka vert likevel ståande i høve til Milosevic og dei nære støttespelarane hans.

Føresegna tek til å gjelde straks.