Utanriksminister Thorbjørn Jagland skal 11. og 12. mai delta på det årlege utanriksministermøtet i det såkalla Lysøen-samarbeidet i Luzern i Sveits. Det var Noreg og Canada som tok initiativet til Lysøen-samarbeidet etter eit norsk-canadisk utanriksministermøte på Lysøen utanfor Bergen våren 1998. Møtet resulterte i ei erklæring som trekker opp rammene for samarbeidet. I tillegg til Noreg og Canada, deltar følgjande land på møtet i Luzern, dei aller fleste med sine utanriksministrar: Chile, Hellas, Irland, Jordan, Mali, Nederland, Slovenia, Sveits, Sør-Afrika, Thailand og Austerrike.

Lysøen-samarbeidet er eit uformelt samarbeidsforum som tar opp tema som er viktige for enkeltindividet sin tryggleik og sine rettar. Eit viktig tema på Luzern-møtet er korleis ein kan kontrollera og hindra ulovleg omsetning av handvåpen. Situasjonen i Sierra Leone og andre afrikanske land vil stå sentralt i diskusjonen som eit døme på kva konsekvensar ei ukontrollert spreiing av handvåpen kan få. Dessutan vil ein drøfta frivillige organisasjonars rolle for å trygga enkeltindividet. Utanriksminister Jagland vil bl. a. ta opp konfliktforebygging i sitt innlegg.