P R E S S E M E L D I N G
Administrasjonsdepartementet

Nr. 14/96

Dato: 01.04.96

Kasper Holand ny ekspedisjonssjef i Administrasjonsdepartementet

Kasper Holand blei i statsråd 29. mars utnemnd til ny ekspedisjonssjef i Administrasjonsdepartementet etter Vidar Steine. Holand vil leie Forvaltningspolitisk avdeling, som er ein av Administrasjonsdepartementets største avdelingar med 50 tilsette.

Kasper Holand kjem frå Finansdepartementet, der han leidde administrasjonsavdelinga. Han har med eitt års avbrekk hatt stillinga sidan 1987. Frå mai 1992 til mai 1993 arbeidde han som konsulent for Televerket i fleire prosjekt. Før han kom til Finansdepartementet var han i Noregs Bank, først som byråsjef og seinare som organisasjonssjef. Frå 1979 til 1981 var han byråsjef i Justisdepartementet. Holand er 48 år og cand.polit. frå Universitetet i Oslo med fagkrinsen statsvitskap, russisk og offentleg rett.

Forvaltningspolitisk avdeling arbeider med utvikling og effektivisering av statsforvaltninga. Avdelinga har etatsstyringsansvar for Statsbygg, Statens forvaltningsteneste, Statens informasjonsteneste, Statskonsult og Statens Pensjonskasse. Forvaltningspolitisk avdeling har også ansvar for samordning og administrativ styring av fylkesmannsetaten.